د ایران د قضائیه قوې د نړیوالو چارو مرستیال او د ایران بشري حقونو د مرکزي دفتر د سکرتر پر مشرۍ یو ایرانی پلاوی د شنبې په ورځ کابل ته راغلی د او د بهرنیو چارو وزارت سرپرست مولوي امیر خان متقي سره یې کتلي.
د بهرنیو چارو وزارت ویاند ضیاء احمد تکل وايي، د لیدنې پرمهال په دواړو هېوادونو کې د بندیانو ستونزو ته د رسېدو، د بندیانو د استرداد د هوکړې پر پلې کولو، پر اعدام محکومو افغانانو ته پر بدیلو میکانېزمونو او د افغان کډوالو پر اړوندو حقوقي او جنایي برخو کې له یو بل سره پر همکارۍ ټینګار شوی دی.
تکل زیاته کړې:« د دواړو هېوادونو ترمنځ د بندیانو ستونزو د رسېدو، د بندیانو د استرداد موافقتنامې پلې کول، پر اعدام د محکوم شویو افغانانو ته د بدیلو میکانیزمونو پیداکولو او د افغان کډوالو اړوند حقوقي او جنايي برخو کې له یو بل سره د همکاریو ترسره کول په اړه مفصلې خبرې وشوې. متقي په ایران کې د افغان بندیانو د وضعیت ارزونې په موخه د سیاسي او کونسلي استازولیو له خوا بندیانو سره د کتلو او په یاد هېواد د بندي افغانانو ستونزو ته د لاسرسي زمینې برابرولو غوښتنه وکړه. »
د ايراني رسنيو د راپورونو له مخې، د دې هېواد د قضائیه قوې د نړیوالو چارو مرستیال غریب ابادي له د بهرنیو چارو وزارت له سرپرست مولوي امیر خان متقي سره د ترهګرو او داعش پر وړاندې د جدي مبارزې په اړه هم غږېدلی او دواړو لورو دې هدف ته د رسېدو لپاره د ګډې کمېټې پر جوړولو ټینګار کړی دی.
تکل وايي، ايراني پلاوي په دې هېواد کې د افغانانو د ځورولو پېښو مخنیوي لپاره د ځينو اقداماتو ژمنه کړې ده.
خو د سیاسي چارو کارپوهان د دې لیدنې په تړاو بیا وېشلې نظرونه لري.
د سیاسي چارو کارپوه نجیب الله جامع وايي:« د افغانستان له حکومته زموږ غوښتنه دا ده او ټېنګار پرې کوو چې ایران پر دې قانع کړي چې هېڅ افغان هلته چې په هر جرم نیول شوی وي هغه باید اوږدمهال زندان تېر نه کړي، افغانستان ته راشي او ترڅنګ یې دوی (ایران) پر افغانانو باندې د اعدام حکوم عملي نه کړي او دغه چاره او مسوولیت کابل ته وسپاري.»
د سیاسي چارو کارپوهان کابل ته د ایراني پلاوي سفر د دواړو هېوادونو پر ګټه بولي او وایي، د ورته سفرونه له لارې د دواړو هېوادونو اندېښنې له یو بل سره پر شريک کېدو سربېره، د حل لارو په اړه بحث او همکاريو ته زمينه برابرېدای شي.
د سیاسي چارو کارپوه سرور نیازی وايي:«ځېنو مسایلو باندې هوکړه شوې. زموږ هېله دا ده چې د افغانستان اړیکې له ټولې نړۍ سره د دوستۍ او ورورولۍ پر اساس وي. کوم اختلاف چې له ځېنو هېوادونو سره رامنځته شوي، لکه څرنګه چې ایران سره هڅې روانې دي باید له نورو هېوادونو سره هم دغه اړیکې له سره ورغول شي ترڅو موږ په افغانستان کې د سولې او ثبات خاوندان شو.»
ايران که څه هم اسلامي پر رسميت نه دی پېژندلی، خو د ګاونډي هېواد په توګه يې له افغانستان سره تعامل روان ساتلی دی.
اسلامي امارت هم په وار وار ډاډ ښودلی، چې د متقابل احترام د اصل په چوکاټ کې له هېوادونو سره د نېکو او حسنه اړيکو غوښتونکی دی.
