د روسیې بهرنیو چارو وزیر سرګي لاوروف په یوه خبري کنفرانس کې ویلي افغانستان د عراق ، لیبیا او دېته ورته نورو هېوادونو پر برخلیک اخته دی، چې امریکا او متحدینو یې په کې خپلې موخې تعقيبولې.
د لاوروف په خبره، د افغانستان سرپرست حکومت مسوول دی څو دغلته له ټولو سیاسي جهتونو سره خبرې وکړي او په یوه ټغر یې سره راټول کړي.
لاوروف زیاته کړې:« امریکا هر هغه څه په افغانستان کې ترسره کړل، چې په عراق، لېبیا او دې ته ورته هېوادونو کې یې ترسره کړي وو. اوس واکمنو چارواکو ته په کار ده، چې له ټولو سیاسي جهتونو سره خبرې وکړي او د حکومت په اډانه کې ځای کړي.»
د اسلامي امارت ویاند ذبیح الله مجاهد بیا وايي، د حکومت او کابینې جوړول د افغانستان کورنۍ مساله ده او هېڅ هېواد ته په کار نه ده، چې د افغانستان په کورنیو چارو کې لاسوهنه وکړي.
هغه زیاتوي:« دا د افغانستان کورنۍ موضوع ده. د افغانستان اسلامي امارت هڅه کوي چې ټول هغه هېوادوال چې بهر کې دي هغه بېرته هېواد ته راشي او خپل ژوند وکړي. هغه څېرې چې په تېرو نظامونو کې یې ازموینه ورکړې د افغانستان د بدبختۍ لامل شوي، د افغانستان ولس یې نه غواړي. نور هېوادونه هم باید له موږ هغه څه وغواړي چې هغه د نورو هېوادونو ترمنځ هم مطرح وي، نه دا چې زموږ په کورنیو موضوعاتو کې دوی بحث وکړي.»
بل خوا د سیاسي چارو کارپوهان وايي، هغه سیاسي څېرې او د پخواني حکومت چارواکي چې په تېر کې ازمویل شوي، باید نور د افغانستان په راتلونکي برخلیک ټاکلو کې حق ورنه کړل شي.
په ورته وخت کې د افغانستان لپاره د روسیې ځانګړي استازي ضمیر کابلوف بیا په روسیې کې د ایران له سفیر سره د افغانستان د امنیت او نورو اړوند مسایلو په تړاو خبرې کړي دي.
