د افغانستان لپاره د اروپایي ټولنې شارژدافیرې رافایلا یودیچې د کورنیو چارو سرپرست وزیر سراج الدین حقاني سره په لېدنه کې د یو لړ مهمو موضوعاتو ترڅنګ راتلونکې میاشت په دوحه کې د افغانستان په اړه د ښکېلو هېوادونو د جوړېدونکې غونډې په اړه خبرې کړي دي.
په دې لېدنه کې سراجالدین حقاني ویلي، افغانستان له لسیزو بې ثباتۍ، جګړو او ناخوالو وروسته د سیاسي، امنیتي، او اقتصادي ثبات لور ته روان دی.
د کورنیو چارو وزارت ویاند عبدالمتین قانع وايي: « خلیفه صاحب وویل، افغانستان له څو لسیزو بې ثباتۍ او ناخوالو وروسته په چټکۍ سره د سیاسي او اقتصادي ثبات په لور روان دی او له ډېرې مودې وروسته افغانان د فزیکي او رواني امنیت احساس کوي. د کورنیو چارو سرپرست وزیر د افغانستان له اسلامي امارت سره د بهرنیو د تعامل په اړه وویل، افغان حکومت باید په نړیوالو مهمو نهادونو کې خپل غړیتوب ترلاسه کړي، په دې توګه به افغانان هلته خپلې واقعي استازولۍ ولري او د مسایلو حل به هم اسان شي.»
د کورنیو چارو سرپرست د اروپايي ټولنې سفیرې سره په خبرو کې ټینګار کړی، چې د مسایلو د ښه حل په موخه دې د افغانستان سرپرست حکومت ته په نړۍوالو بنسټونو کې غړیتوب ورکړل شي، ترڅو افغانان وکولی شي خپله رېښتېنې استازولي وکړای شي.
په ورته مهال یودیچي د امنیت برخه کې د سرپرست حکومت هڅې ستایلي او ډاډ یې ورکړی چې له افغانستان سره بشري مرستو ته دوام ورکوي.
د کورنیو چارو وزارت ویاند عبدالمتین قانع وايي: « اغلې یودیچې په دې لېدنه کې په افغانستان کې راغلی امن او له نشه يي توکو سره مبارزه وستایله، نوموړې دغه راز په افغانستان کې د ښکېلو هېوادونو ترمنځ راتلونکې میاشت دوحه کې جوړېدونکې ناستې په اړه هم خبرې وکړې او د همکارۍ ډاډ یې څرګند کړ، اغلې یودیچې د اروپايي ټولنې په استازیتوب د هرات زلزله ځپلو او هېواد ته راستنېدونکو افغانانو د همکارۍ په ګډون د نورو بشري مرستو یادونه هم وکړه.»
دغه غونډه کې به د لارې د یوې نقشې په اړه د نړیوالې اجماع د رامنځته کولو او د ملګرو ملتونو د خپلواکو ارزونو پر وړاندیزونو خبرې اترې ترسره شي.
په قطر کې د اسلامي امارت د سیاسي دفتر مشر سهیل شاهین شمشاد ته وویل، په قطر کې د افغانستان په تړاو جوړېدونکې ناسته مهمه ده خو په خبره یې باید په دې ناسته کې د اسلامي امارت استازي ته بلنه ورکړل شي.
شاهین زیاتوي: « د افغانستان په اړه هره غونډه چې ترسره کېږي، هغه که په دوحه کې وي او یا په بل هېواد کې وي د افغانستان د اسلامي امارت د پلاوي ګډون په کې اړین دی، ترڅو د مسایلو په اړه خپل نظر وړاندې او موقف واضح کړي. همداراز د داسې غونډو په اجنډا کې باید د افغانستان د ولس غوښتنې شاملې شي، لکه اوس چې په افغانستان کې د خلکو غوښتنه دا ده چې په هېواد کې کاري فرصتونه ایجاد شي، انکشافي پروژې پلې شي، بندیزونه ختم شي او دې ته ورته نورې غوښتنې لري، دا ولسي غوښتنې دي او باید د داسې غونډو د اجنډا په سر کې راشي.»
خو اوس پوښتنه داده، چې د دوحې ناسته به د افغانستان لپاره څه پایلې ولري؟
د نړیوالو اړیکو کارپوه نجیب الرحمن شمال وايي: « د دغو ستونزو او نړیوالې ټولنې د نیوکو د له منځه وړلو لپاره د افغانستان سرپرست حکومت باید د حکومتولۍ او د حکومتولۍ د سیستم د بدلون او د افغانستان د خلکو له غوښتنو سره سم، د حکومت جوړونې لپاره اړین تدابیر ونیسي.»
د سیاسي چارو کارپوه محمد اسلم دانش مل وايي: « باید له افغانستان سره ښې اړیکې ولري او افغانستان هم تر ټولو زیاته اړتیا دې ته لري چې باید د سیمې او نړۍ له هېوادونو سره ښې اړیکې ټينګي کړي، ترڅو له راغلي امن او پرمختګ ته برابره شوې زمینې څخه په ښه ډول ګټه واخلو. موږ اړتیا لرو چې له ټولو هېوادونوسره ښې اړیکې وپالو او د دې اړیکو د ساتلو لپاره دولت ته هم په کار دي چې نړیوالو غوښتنو باندې غور او تجدید نظر وکړي.»
سراج الدین حقاني دغه راز په دې لېدنه کې له نړۍوالې ټولنې سره د مانا داره تعامل غوښتنه کړې او ویې ویل، چې اسلامي امارت باید په نړۍوالو مهمو بنسټونو کې خپل غړیتوب ترلاسه کړي.
د ملګرو ملتونو د سرمشني انټونیو ګوټېرېش د ویاند مرستیالې سټیفانې ترمبلې له دې مخکې په یوه کنفرانس کې ویلي ول چې ملګري ملتونه په پام کې لري چې په دوحه کې د افغانستان په اړه دویمه غونډه جوړه کړي.
