د ملي امنیت پخوانۍ مشر رحمت الله نبیل د افغان سولې خبرو کې د امریکا د ځانګړي استازي زلمي خلیلزاد او د پاکستان پر نیت شک لري او د سولې پروسه یوه معامله بولي.
رحمت الله نبیل نن په کابل کې د یوې خبري ناستې پر مهال پر حکومت نیوکې وکړې چې د نظام د بقا پر ځای یې نظام کمزوری کړی او په ډیورنډ کرښه کې د اغزن سیم په تړاو چوپ پاتې دی.
نبیل دغه راز د افغانستان راتلونکي وضعیت ته اندېښنه وښوده او د نورو جنګي ډلو د پیدایښت خبرداری یې ورکړ.
رحمت الله نبیل په دې باوري دی چې د افغانستان برخلیک او کنترول یو ځل بیا د پاکستان لاسته ور روان دی او د افغان سولې په خبرو کې د زلمي خلیلزاد پر ښه نیت شک لري.
نبیل وویل: ((مونږ باید په افغان سولې شک وکړو. ولې د افغانستان خلک د سولې پروسې څخه بهر ساتل شوي دي؟ ولې پاکستان ته د افغان سولې په تړاو د ویټو حق ورکړل شوی دی.))
نبیل وايي، د امریکا ځانکړی استازی زلمی خلیلزاد د امریکا ګټو ته ډېر ژمن دی او د ځینو هېوادنو لپاره د سولې پروسه اقتصادي او سیاسي شوې ده.
نبیل زیاتوي، تر اوسه د امریکا او طالبانو تر منځ شوې هوکړه روښانه نه ده، چې څه په کې دي او دا د دې ښکارندوي کوي، چې د امریکا له وتو وروسته به جګړه توده شي.
رحمت الله نبیل د حکومت پر ساسي مشرانو نیوکې وکړې، چې خپلمنځي اختلافاتو یې ملي یوالي ته زیان رسولی دی.
نبیل وایي چې په ډيورنډ کرښه کې د پاکستان لخوا غزول شوی اغزن سیم باندې شکمن دی چې معامله به شوې وي او که داسې نه وي نو ولي حکومت چپ پاتې دی.
نبیل په خپلو خبرو کې دا هم وویل چې پاکستان ډېر زیات امتیازونه لکه د اغزن سیم غزول، اخیستي او په وینا یې چې پاکستان حتی په افغان حکومت کې افراد هم مقرر کړي دي.
نبیل همدا راز له طالبانو وغوښتل، چې روان جګړه یواځې افغان وژنه ده او په هېواد کې لویه توطیه روان ده چې له مخې یې افغانستان کې د جګړې لمن پراخه شوې.
د ملي امنیت پخواني مشر دغه راز وویل چې د سولې لپاره اوسنۍ فورمول کار نه کوي او د مصالحې عالي شورا مشر عبدالله عبدالله باید له ځانه سره څو مخور او د ولسي جرګي غړي یوځای کړي او په مستقیم ډول په قطر کې له ملابرادر سره د افغانانو پر پوښتونو او اندېښنو خبرې وکړي.
