د خوست مرکز په څو کیلومټرۍ کې پرتې د پستې پالې په سیمه کې شااوخوا ۵۰۰ کورنۍ مېشتې دي.
د اوسېدونکو په څېرو کې يې محروميت له ورايه ښکاري او ان تر دې، چې له دې وړاندې له رسنيو سره نه دي مخ شوي او له همدې کبله خبريالانو ته حېران ګوري.
دوی وايي، د حکومتونو د نه پاملرنې له کبله کلونه کېږي، چې د ژوند هرې برخې د ستونزو کړاو ګالي.
د پستې پالې سیمې یو تن اوسېدونکي وايي: « هېڅ حکومت ورته پاملرنه نه ده کړې، که په جمهوریت که وه او که اوس اسلامي امارت دی. زموږ غږ چا نه دی اورېدلی، خلک هم بې کاره او مجبور دي.»
د پستې پالې یو بل اوسېدونکی بیا وايي: « په دې وطن کې اوبه نشته، لارې او سړکونه خراب دي، کلېنیکونه او ښوونځي خراب دي، په هره برخه کې ستونزې لرو، بې وزله خلک نه موټر لري، نه موټرسایکل لري؛ نو له ډېرو ستونزو سره مخ دي.»
ځایي اوسېدونکي همدا راز وايي، د سړک خرابولي، روغتیایي خدمتونو نشتون، بېروزګارۍ او پر بد اقتصادي وضعیت سربېره د ښوونځي ودانۍ او لېسې نه لرلو له امله یې د سیمې له ډېرو ځوانانو زدهکړې هم په نیمه کې پاتې کېږي.
د پستې پالې سېمې یو تن اوسېدونکی وايي:« د همدې ستونزو له امله زموږ ډېری زده کوونکي ابتداییه دوره پای ته ورسوي او بیا په کور کېني.»
هم مهاله ځایي چارواکي ډاډ ورکوي، چې په خوست کې به د لرو پرتو سیمو مېشتو وګړو لپاره منظم پرمختایي پلانونه پلي کړي.
د دوی په خبره چې په دې تړاو یې د یادو سیمو له خلکو سره مشورې او ناستې کړي څو په دې برخه کې اساسي اړتیاوې مشخصې او کار پرې وکړي.
د خوست مرستیال والي محبوب شاه قانت وايي: « په ټوله کې د خوست ولایت څومره ولسوالۍ چې دي، هغه که په لرو پرتو سیمو کې دي او که نږدې د دوی ستونزې موږ درک کړې او دا ستونزې به حلوو؛ ان شاءالله.»
له دې وړاندې د خوست نورو سيمو اوسېدونکو هم ورته شکايت کړی او له حکومت يې غوښتي چې د ستونزو حل په موخه دې ورته کافي او هر اړخيز خدمتونه وړاندې کړي.
