د ولسمشر ویاند صدیق صدیقي نن په کابل کې یوې خبري ناستې ته وویل چې طالبانو د سولې خبرو د پیل لپاره پر خپلو ژمنو عمل نه دی کړی او دوی باید د سولې پروسې ته چمتو شي.
صدیقي دغه راز وویل چې د طالبانو له لوري تاوتریخوالی افغان حکومت ته د منلو وړ نه دی او د تاوتریخوالي زیاتېدل د سولې بهیر او د خلکو سولې ته د رسېدو هیلې زیانمنوي.
د ولسمشر ویاند یو ځل بیا ټینګار وکړ چې افغان حکومت د سولې لپاره هېڅ شرط نه لري او افغان جګړې ته د پای ټکی کېښودل غواړي.
صدیقي دغه راز په طالبانو غږ وکړ چې تاوتریخوالی کم کړي او د سولې ته د رسېدو فرصت له لاسه ورنکړي.
صدیقي دا هم وویل چې طالبان دې باید په افغانستان کې رامنځته شوي بدلونونه ومني او هیله یې څرګنده کړه چې طالبان به یوه ورځ له افغان حکومت سره د سولې هوکړه لاسلیک کړي.
صدیقي د طالب بندیانو د خلاصون په اړه وویل چې افغان حکومت د هوکړې له مخې تر دې مهاله د طالبانو ۹۰ سلنه بندیان خوشې کړي دي.
د ولسمشر ویاند همدا راز وویل چې داسې هېڅ سروې نه ده شوې چې وښيي د افغانستان ۹۰ سلنه وګړي د بې وزلۍ تر کرښې لاندې ژوند کوي او وروستۍ سروې په ۱۳۹۵ کال کې شوې چې ښيي ۵۵ سلنه خلک د بې وزلۍ تر کرښې لاندې ژوند کوي.
تر دې وړاندې، ولسمشر غني ویلي وه، چې افغانستان کې ۹۰ سلنه وګړي د بې وزلۍ تر کرښې لاندې ژوند کوي.
ولسمشر ویاند صدیق صدیقي د ولسي جرګې لخوا د ملي دسترخوان د پروګرام رد کېدو ته په غبرګون کې وویل چې د ولسي جرګې غړو د یاد پروګرام په اړه معلومات نه درلودل او باید مخکې له دې چې یاد پروګرام رد کړي، په اړه یې دقیق معلومات راټول کړي وای.
