اسټرالیايي ځواکونو کندهار کې د خپل ماموریت پر مهال په قصدي توګه ۱۰ ولسي وګړي وژلي دي.
په اسټرالیا کې اې بي سي خبري اژانس په یوه څېړنیز راپور کې وایي، ددغه هېواد ځانګړو ځواکونو په ۲۰۱۲ کال کې په کندهار کې یو لړ عملیات ترسره کړي چې په هغه کې یې د عیني شاهدانو له قوله په قصدي توګه لس ولسي وګړي وژلي دي.
عیني شاهدان او اسټراليايي سرچینې بیا دا هم وایي چې په دې عملیاتو کې څو کسه طالبان هم وژل شوي وو.
دا لومړی ځل نه دی چې د اسټرالیايي ځواکونو په اړه دغه ډول راپورونه خپرېږي، بلکې تر دې وړاندې هم د دغه هېواد عسکر په اروزګان کې د ګڼو ملکي وګړو په وژلو تورن دي او همدا راز په دې مجرم پېژندل شوي چې په افغانستان کې یې د هتلر د واکمنۍ بیرغ پر خپلو ټانکونو ګرځولی و.
د استرالیا حکومت بیا تر دې وړاندې ژمنه کړې وه چې دغه ډول تورونه به په هر اړخیزه توګه څېړي.
