د پاسپورټ ریاست د تېرې چهارشنبې په ورځ پر کاغذي غوښتنلیکونو د پاسپورټ د ترلاسه کولو لړۍ پېل کړه.
د یاد ریاست ویاند نور الله پتمن وايي، دغه لړۍ یې د پاسپورټ ترلاسه کوونکو لپاره د اسانتیاوو د رامنځته کولو په موخه پېل کړې او یوازې تېره چهارشنبه يې څه باندې ۲۰ زره کاغذې عریضې یې ترلاسه کړي، چې چارې به يې په چټکۍ سره برسي شي.
پتمن زیاتوي: « په لومړۍ ورځ زرګونه کسان راغلي وو چې له دې ډلې مو ۲۰ زره کسانو څخه سپینې عریضې واخېستې او ټوکن مو ورکړ. پر دغو عریضو او ټوکنو کار روان دی، نن د اوونۍ لومړۍ ورځ یعنې شنبه ده او د دې ورځې ټوکن چې چا ترلاسه کړي ول، پر هغې کار روان و، نن عریضې ووېشل شوې، هېوادوال راغلل، څوک پیسې تحویلوي او څوک نور مراحل پرمخ وړي.»
پتمن وايي، د پاسپورټ ریاست رهبري د يوې داسې طرحې پر جوړولو کار پيل کړی چې له بشپړېدو سره به یې په کابل کې د پاسپورټ د وېش دوه نوي مرکزونه جوړ شي.
د پتمن په خبره، په کابل کې يې د پاسپورټونو د ویش نویو مرکزونو له جوړېدو موخه د پاسپورټ د وېش په بهیر کې د اسانتیاوو رامنځته کول دي.
هغه زیاته کړه: « کله چې ټولې تخنیکي چارې بشپړې کړو او کافي سټاف ورته برابر کړو، کومو وسایلو ته چې اړتیا ده دا ترلاسه کړو، له هغې وروسته به نور مرکزونه هم پرانیزو، ښايي دوه نور مرکزونه خلاص کړو چې پر طرحه یې کار کېږي، ځکه یو مرکزي ریاست بسنه نه کوي، ترڅنګ یې باید نورې څانګې هم خلاصې شي، ترڅو هېوادوال په اسانۍ پاسپورټ ترلاسه کړي.»
د پاسپورټ رياست د مالوماتو له مخې، دمګړۍ په ټول هېواد کې په ورځنۍ توګه شاوخوا ۸زره ټوکه پاسپورټونه وېشل کېږي او د دغه شمېر زیاتوالي لپاره هڅې روانې دي.
پتمن وايي، د پاسپورټونو د وېش لړۍ په شفاف ډول روانه ده او تېر کال له ۲۰۰ ډېر کمېشنکاران او جعلکاران عدلي او قضايي ارګانونو ته ورپېژندل شوي.
پتمن زیاتوي: « د پاسپورټ په برخه کې چې چا جعلکارۍ او هڅې کولې هغوی نیول شوي او اړونده قضايي ارګانونو ته سپارل شوې دي، د ۱۴۰۱ کال په شا او خوا کې نږدې ۲۰۰ جعکاران او کمېشکاران نیول شوي وو؛ نو په ټوله کې د پاسپورټ ریاست په پروسه کې موږ هڅې وکړې چې د جعلکارۍ مخه ونېسو.»
نوموړی وایي، دم ګړۍ د پاسپورټ اخېستلو په برخه کې د کمېشن کارۍ کچه ټېټه شوې ده.
د پاسپورټ رياست د مالوماتو له مخې، په ۱۴۰۲ هجري لمریز کال کې په ټول هېواد کې څه باندې ۷۰۰ زره پاسپورټونه وېشل شوي او دغه رياست ډاډ ورکوي، چې بانکونو ته د پاسپورټ تعرفو د ورکړې په برخه کې د اسانتياوو رامنځته کولو په موخه به، له یو شمېر خصوصي بانکونو سره تړون لاسلیک کړي.
