د سمنګان په ایبک ښار کې د ملي امنیت ریاست مخې ته نن له غرمې مخکې شاوخوا یوولس بجې لومړی موټر بم برید وشو او وروسته ۴ تنه وسله وال ودانۍ ته دننه شوي وو او نښته شوې ده.
د سمنګان والي عبدالطیف ابراهيمي وايي، په برید کې د ملي امنیت لس تنه منسوبین وژل شوي او د امنیتي ځواکونو په ګډون ۵۴ تنه نور ټپيان دي.
د والي په خبره، برید ۱۱ بجې پیل او ۳ بجې پای ته ورسید.
والي دغه راز وایي، برید کوونکي څلور تنه ول، چې د امنیتي ځواکونو لخوا وژل شوي دي.
طالبانو بیا ادعا کړې ده چې په دغه برید کې، چې په موټر بم پیل شو، د ملي امنیت ریاست ۷۰ کار کوونکو ته مرګ ژوبله اوښتې ده.
خو والي بیا وایي چې برید کې یوازې د ملي امنیت لس تنه منسوبین وژل شوي او د امنیتي ځواکونو په ګډون ۵۴ تنه نور ټپیان دي.
خو د سمنګان عامې روغتیا ریاست بیا وایي چې پېښه کې ۶۳ تنه ټپیان دې چې ۸ تنه میرمنې او ۲ تنه ماشومان هم پکې شامل دي.
