له نشو راګرځول شوي کسان د درملنې له امله خوښ دي او تمه لري چې له مسلکي روزنې وروسته به په ټولنه کې عادي ژوند ته دوام ورکړي.
له نشو راګرځول شوي یو تن وايي: « له دولته مو غوښتنه داده چې کله موږ له دې ځایه فارغ شو، لومړی د کار وسایل اړین دي، چې موږ دا نلرو نو ښه ده چې موږ ته د کار وسایل راکړي څو موږ دې ته اړ نه شو د همدې وسایلو د پيرلو ته د پیسو پيدا کولو لپاره نورو هېوادونو ته لاړ شو، وسایل دې راکړي چې څنګه له دې ځایه فارغ شو، نو سمدستي پر خپل کار بوخت شو.»
له نشو راګرځول شوی یو بل تن وايي: « زما ژوند کې ډېر بدلون راغلی، کور بېرته اعتبار راباندې پيدا کړی، هغه وخت راباندې بې اعتباره وو، کور کې به مې جنګونه او جنجالونه ډېر کول، اوس شکر د کورنۍ غړي بېرته راسره جوړ شوې دي او زه هم غواړم دا کار زده کړم، خپلې ټولنې ته خدمت وکړم او د یوه ښه انسان په توګه خپل ژوند پرمخ یوسم.»
دوی ته له دری میاشتۍ درملنی وروسته د کار او ټولنیزو چارو وزارت له خوا د درېيو میاشتو لپاره په پنځو بېلابېلو برخو کی مسلکي زده کړی ورکول کیږی او وروسته له درېیو میاشتو زده کړو، د خپلې کورنۍ په ضمانت له همدی کمپ څخه رخصت کېږي.
علي د کابل اوسېدونکی دی، خو زوکړه یې په ایران کې شوې او کورنۍ یی اوس هم ایران کی اوسي.
نوموړی وایي، افغانستان ته په چکر راغلی و، چی د یوه ملګري له خوا پر نشې روږدی او همدلته پسې پاتی شو؛ د علی که څه هم په دې کمپ کې له يو نيم کال درملنې وروسته رغېدلی، خو کورنۍ یی نشته، چی د نوموړي ضمانت وکړي او له کمپ يې وباسي.
هغه زیاتوي: « پوره یو کال وشو چې زه په دغه روغتون کې یم، کورنۍ مې له ما خبره نه ده، یوازې په دې خبر دي چې افغانستان کې یم خو له دې نه دي خبر چې زه یوه روغتون کې یم او په نشه توکو روږدی شوی وم. اوس مې له کورنۍ هېله دا ده که زما غږ اورئ نو راشئ ما له روغتونه یوسئ چې نور له خپلې کورنۍ سره ژوند وکړم.»
د کار او ټولنیزو چارو وزارت مسوولین وایي، په دې کمپ کی یی شاوخوا ۵۲۰ هغو کسانو لپاره، چې د نشهيي توکو له کارولو راګرځول شوي درې میاشتنۍ مسلکي زدهکړې پیل کړې او له فارغیدو وروسته به ورته د کار زمينې په برابرولو کی هم مرسته وکړي.
د کار او ټولنیزو چارو وزارت ویاند سمیع الله ابراهیمي وايي: « په دغه پرګرام کې چې موږ یوه دوره فارغین هم درلودل، اوس نږدې تر ۵۲۰ شاوخوا هغه کسان چې له نشو راګرځول شوې او جوړ شوې دي، د پنځو بېلابېلو حرفو په زده کړو بوخت دي. په دې حرفو کې خیاطي، د بوټانو ګنډل، د بیکونو ګنډل، تعمیراتي برق او همداراز د کور د برقي وسایلو ترمیم شامل دي.»
هغوی چې له نشې راګرځول شوي او د معتادينو د درمنلې په کمپ کې پر مسلکي او حرفوي زدهکړو بوخت دي وايي، دغلته شاوخوا ۳۰۰ داسی کسان هم شته چی تر کال یی زیات وخت شوی، خو د کورنۍ غړي یې یا خبر نه دي او یا هم له هېواد نه بهر دي، څو یی د رخصتولو کولو لپاره ضمانت وکړي .
د کار او ټولنیزو چارو وزارت مسوولین وایی، د یادو کسانو لپاره یی پلان جوړ کړی تر څو هغه کسان هم خوشې کړیي، چې په دې کمپ کی یې زیات وخت تیری کړی او د کورنۍ غړي یې مالوم نه دي.
