د ولسمشر ویاند صدیق صدیقي، رسنیو سره په خبرو کې وویل، افغان حکومت د بین الافغاني مذاکراتو د پیل لپاره هر هغه څه کړي، چې اړتیا وه او اوس باید طالبان پر خپله برخه کار وکړي.
صدیقي وویل، طالبان دې د دایمې سولې لپاره، تاوتریخوالی کم کړي، بین الافغاني مذاکراتو ته دې کیني او ملت ته دې د هغو پېښو په اړه وضاحت ورکړي، چې دوی یې ترشا دي.
د ولسمشر ویاند صدیق صدیقي وویل: ((هغه ټول بریدونه چې تېره اوونۍ شوې دي، طالبان د دې بریدونو ترشا دي. او که چیرې دوی [طالبان] د دې بریدونو تر شا نه دي، نو بیا دې ملت ته ځواب ورکړي. زموږ په باور، د طالبانو لخوا د تاوتریخوالي ډیرېدل، بریدونه…مستقیم کېدای شي پر سوله باندې خپل بد تاثیر ولري.))
صدیقي دغه راز وویل چې هېواد کې دایمي سوله د دوی له لومړېتوبو څخه ده او د دې لپاره هر هغه څه چې اړتیا وه، حکومت کړي او اوس دې طالبان هر هغه څه وکړي، چې د افغانانو خپلمنځي خبرو ته لار هواروي.
د ولسمشر ویاند صدیق صدیقي په خپلو خبرو کې همدا راز وویل: ((د افغان حکومت مذاکراتي ټیم د بین الافغاني خبرو ته چمتو ده او له طالبانو هم غواړو چې ورته ګام واخلي، تاوتریخوالی کم کړي، او بین الافغاني خبرې پیل کړي.))
دا په داسې حال کې ده چې د ملي امنیت شورا د معلوماتو له مخې، تیره اوونۍ په وروستیو ۱۹ کلونو کې تر ټولو خونړۍ وه. دوی وایي، د طالبانو د وسلوالو فعالیتونو په پایله کې تیره اونۍ، ۸۴۱ افغان ځواکونو او ۲۹۱ ولسي وګړو ته مرګ ژوبله اوښتې.
