ملګري ملتونه د هغو ډله اییزو قبرونو په تړاو د څیړنې غوښتونکي شول چې په لیبیا کې موندل شوي دي.
لیبیايي چارواکي وايي دغه قبرونه په هغه سیمه کې موندل شوي چې له تیرو څو میاشتو راهیسې د خلیفه حفتر ځواکونو په واک کې وه.
ملګري ملتونه وايي دا په جنګي جنایتونو کې شمیرل کیږي او باید هغه کسان نړیوالې جنايي محکمې ته وړاندې شي چې دا ډول جرمونه کوي.
د ملګرو ملتونو د بشر حقونو ادارې تېره ورځ دغه راپور خپور کړی دی.
اخوا په لیبیا کې د کرونا له ستونزې وروسته د خلیفه حفتر او حکومت ترمنځ جنجالونو یو ځل بیا زور اخیستی دی.
بل پلو مصر هم په دغه هیواد کې د لاسوهنې خبر ورکړی چې د قومندان حفتر له لوري یې هرکلی شوی دی.
قومندان حفتر وايي ترکیې د حکومت په ملاتړ ځواکونه لیبیا ته استولي او د مصر مداخله یې یو ښه ځواب دی.
