افغان حکومت طالبانو له لوري د وروستيو بریدونو او د تاوتریخوالي د دوام غندنه کړې او دا بریدونه یې سولې ته د ژمنتیا روحیې خلاف بللي دي.
ارګ په یوې اعلامیې کې ویلي، ولسمشر محمد اشرف غني نن سهار د کابینې په غونډه کې ویلي چې د افغان حکومت د بندیانو خلاصون، د طالب بندیانو د تبادلې لپاره د پرمختګ عمده شرایطو څخه دی.
په اعلامیه کې دغه راز راغلي چې ولسمشر غني د کرونا ویروس له امله د مړو شویو کسانو له کورینو سره هم تسلیت او غمشریکۍ څرګنده کړې ده.
د کابینې په دغه غونډه کې ولسمشر غني د چارو ادارې عمومي ریاست په ګډون مسوولو بنسټونو، بازرس ادارې او د تفتیش عالي ادارې ته هم امر کړی چې کرونا سره په مبارزه کې له منابعو څخه د ناسمې استفادې راپورونه په یوه اوونۍ کې وڅېړي.
اعلامیه کې همدا راز راغلي، ولسمشر غني د ټولیزو رسنیو قانون کې د تعدیل په تړاو پارلماني چارو کې د دولت وزارت ته لارښوونه کړې چې د ټولیزو رسنیو قانون کې د تعدیل وړاندیز شوې طرحه بېرته له پارلمان څخه راوګرځوي، ترڅو یاده طرحه د ولسمشر دویم مرستیال تر نظر لاندې د هیواد د رسنیو ټولنې سره په مشوره لا ډېره دقیقه شي.
اعلامیه لیکي، ولسمشر غني د پیسو نړیوال صندوق څخه د مرستو په اړه ویلي چې د افغانستان لپاره د دې بنسټ مرستې د پروژو د لګښت لپاره نه دي، بلکې د افغانستان د بودجې د ثبات لپاره دي.
ولسمشر دغه راز ویلي چې دغه مقدار پیسې احتیاطي او بلاعوضه دي او هغه مهال چې د افغانستان دولت مالي ستونزو سره مخ کېږي، دغه مرستې به په احتیاطي پیسو کې موجودې وي.
