ملګرو ملتونو په افغانستان کې د اداري فساد په اړه خپل څلورم کلني راپور کې لیکلي، لا هم په افغانستان کې فساد شته او پر وړاندې یې اغیزناکه مبارزه نه ده شوې.
د ملګرو ملتونو سیاسي دفتر یا یوناما په دغه کلني راپور کې دا هم راغلي چې د فساد موجودیت د دې سبب شوی چې په افغانستان کې د سوکالۍ، سولې او پرمختګ په لار کې خنډونه جوړ شي.
په دغه راپور کې دغه راز راغلي چې د تېرو کلونو په پرتله د فساد پر وړاندې ډېر کم اقدامات شوي دي او افغان حکومت چې د فساد ضد کومې تګلارې جوړې کړې وې، یوازې لنډ مهاله سندونه وو چې عملي نه شول.
ملګري ملتونه پر حکومت نیوکه کوي چې د فساد پر وړاندې مبارزه یې اغېزناکه نه ده، اداري تشې یې ډکې کړې نه دي، اغېزناکې تګلارې یې د فساد د ختمولو لپاره نه دي جوړې کړې او په دې برخه کې یې فعالیتونه موثر نه دي.
ملګرو ملتونو ویلي چې دوی د فساد ضد مبارزه کې له افغان حکومت سره همکاري کوي او پر حکومتي مشرانو یې غږ کړی چې له فساد سره مبارزه خپل لومړیتوب وبولي.
د ولسمشرۍ ماڼۍ ویاند صدیق صدیقي بیا دغه راپور ته په غبرګون کې ویلي چې له اداري فساد سره مبارزه د افغان حکومت لپاره یو له لومړیتوبونو څخه ده.
صديقي نن یوې خبرې ناستې ته وویل، څه چې روښانه دي هغه دا چې فساد سره مبارزه په تېرو پنځو کلونو کې د ولسمشر او افغان حکومت یو له اصلي لومړیتوبونو څخه وه.
