د ولسمشرۍ ماڼۍ ویاند صدیق صدیقي وايي چې د رسنیو د قانون په تعدیلاتو کې د افغان حکومت هدف د رسنیو محدودول نه دی او افغان حکومت د رسنیو نظرونو او اندیښنو ته درناوی لري.
صدیقي په یوه ویډیویي پیغام کې دغه راز ویلي، بیان ازادي د افغان حکومت لپاره لویه لاسته راوړنه ده او افغان حکومت د اساسي قانون څخه د ملاتړ، د بیان ازادي او معلوماتو ته د لاسرسۍ په موخه د رسنیو د قانون په ځینو مادو کې د تعدیل وړاندیز کړی دی.
په دغه ویډیويي پیغام کې صدیقي ویلي چې د بیان آزادي او د رسنیو ازاد فعاليتونه د افغان حکومت د رهبرۍ لپاره خورا مهم اصل دی.
د هغه په وینا، په افغانستان کې د رسنیو فعالیت په سیمه کې بېساري ده او د افغانستان حکومت نه یوازې په رسنیو محدودیتونو نه وضع کوي، بلکې د بیان د آزادي لپاره یې عملي ګامونه اخیستي دي.
له دې وړاندې د ولسمشر دوهم مرستیال سرور دانش هم ويلي وو چې حکومت د رسنیو د آزادۍ محدودولو نیت نه لري.
ښاغلي دانش د چهارشنبه په ورځ یو ټویټ کې ويلي وو چې افغان حکومت اساسي قانون او دغه راز د خپلو اتباعو اساسي حقونو ته ژمن دی، نو پر همدې اساس د رسنیو د آزادۍ محدودولو اراده نه لري.
دانش همدا راز ويلي چې د بیان ازادي او د رسنیو آزادي د افغانستان ترټولو مهمه لاسته راوړنه او د افغان حکومت سره کرښه ده.
څو ورځې وړاندې یو شمېر رسنیو، خبريالانو او د ژورنالیستانو د ملاتړ ادارې ولسمشر اشرف غني ته په یوه پرانستي لیک کې د رسنیو په قانون کې د تعدیلاتو په اړه اندیښنه څرګنده کړې وه.
افغان حکومت په دې وروستیو کې د رسنیو په قانون کې د تعدیلاتو وړاندیز کړی چې له مخې یې په رسنیو ځینې محدودیتونه وضع کیږي.
