د بهرنیو چارو وزارت د افغانستان په تړاو د ملګرو ملتونو امنیت شورا پر وروستي پرېکړهلیک ناخوښي ښودلې او هغه یې د افغانستان حکومت له مشورې پرته یو اړخیزه پرېکړه بللې.
د ياد وزارت مرستیا ویاند ضیاء احمد تکل وايي، د دې شورا یو شمېر دایمي غړو د نظر له اختلاف او د دې سازمان د سیاسي استازولۍ له شتون سره سره افغانستان ته د نوي استازي ګومارل غیر ضروري دي.
تکل هېواد ته د ځانګړي استازي لېږل، په تاریخي لحاظ د شخړو په هوارولو کې ګټوره نه بولي او له دې سازمان غواړي چې د افغانستان په تړاو هره پرېکړه باید د موجوده واقعیتونو په نظر کې نیولو او په خپلواکه توګه ترسره شي.
تکل زیاتوي: « د افغانستان اسلامي امارت د بهرنیو چارو وزارت له دې ناخوښي څرګندوي چې د ملګرو ملتونو د امنیت شورا د دایمي غړیو ترمنځ د نظر اختلاف سرهسره بیا هم ۲۷۲۱ پرېکړه لیک تصویب شو، چې له مخې یې د ملګرو ملتونو له سرمنشي څخه غوښتنه شوې چې د افغانستان لپاره بل ځانګړی استازی وټاکي. د یادولو ده چې د امنیت شورا د دوو دایمي غړو لخوا د ځانګړي همغږي کوونکي د ارزونې په تړاو د لا زیات وخت، بحث او وضاحت غوښتنې سره سره او د افغانستان حکومت سره له مشورې پرته یې یاد پرېکړه لیک تصویب کړ.»
بهرنيو چارو وزارت سره له دې چې له افغانستان سره د ملګرو ملتونو د پیاوړې او پراخې ښکېلتیا هرکلي کوي؛ خو وايي د اسلامي امارت کړنلاره به د نورو په غوښتنو نه، بلکې د افغانانو د دیني عقایدو او کلتوري ارزښتونو په رڼا کې ترسره کیږي.
خو له دې هر څه سره سره د سیاسي چارو شنونکي د دې پرېکړه لیک له مخې د افغانستان لپاره د ملګرو ملتونو د نوي استازي ماموریت د دې سازمان د استازو له تېر ماموریت سره یو شان نه بولي.
د سیاسي چارو شنونکی عزیز معارج وايي: « اوس چې د ۲۷۲۱ پرېکړه لیک له مخې دوی پرېکړه کړې چې د افغانستان لپاره یو استازی وټاکل شي څو د نوې قطعیې نامې او پرګرام چې ۱۳ مادې لري د پلي کولو لپاره ماموریت ترسره کړي. دا استازی لکه مخکې فریدون سينیرلي اوغلو چې و د هغه دنده بل څه وه، د بېلګې په توګه هغه د دې مسایلو همغږي کونکی و یا د یوناما دفتر چې معاونیت دی او دا د دوی بله څانګه مخې ته بیايي، خپله د ملګرو ملتونو د سازمان دفتر چې دی دا ډیپلوماتیک او سیاسي دی، نورې شوراګانې لکه یونېسف، یونسیار او نور هم خپل دفترونه لري چې دا جلا مسایل دي.»
شنونکي دغه راز وايي، د دې پرېکړه لیک له تصویبېدو سره سرپرست حکومت باید له نړۍوالې ټولنې سره د نویو تعاملاتو په لټه کې شي.
د دوی په باور که سرپرست حکومت وتوانیږي له دې فرصته استفاده وکړي کولی شي له دې وضعیت څخه د ځان په نفع ګټه پورته کړي.
د سیاسي چارو شنونکی جنت فهیم چکري وايي: « که د افغانستان د وزارت ډيپلوماسي دستګاه له مسلکي او تجربه لرونکو کسانو ګټه واخلي، د ملګرو ملتونو سازمان د امنیت شورا له لوري د افغانستان د نوي استازي په اړه یاد تصمیم کېدای شي مثبت وګڼل شي او د اسلامي امارت پر ګټه تمام شي.»
دا داسې مهال ده چې د ملګرو ملتونو امنیت شورا چې ۱۵ غړي لري، پنځه هغه یې دایمي او د ویتو حق لري؛ وړمه ورځ د دې سازمان د ځانګړي همغږي کوونکي فریدون سينیرلي اوغلو راپور د یو پرېکړه لیک له مخې تصویب کړ او افغانستان ته یې د یوه نوي استازي د لېږلو پرېکړه وکړه.
هر هغه مهال چې د دې شورا ټول غړي په یوه خوله د ټاکل شوې موضوع په تړاو پرېکړه تصویبوي؛ خو د دې شورا د پنځو دایمي غړو له هېڅ یوه لوري ویتو نه شي؛ نو په دې صورت د ترسره شوې پرېکړې عملي کېدل حتمي کیږي او دې شورا ته د مداخلې حق ورکوي.
