په ملګرو ملتونو کې د افغانستان دایمي استازي نصیر احمد فایق د افغانستان په اړه د ملګرو ملتونو د امنیت شورا د نوي پرېکړه لیک هرکلی کړی دی.
فایق پر خپله اېکس پانه په ملګرو ملتونو کې د متحده عرب اماراتو او جاپان استازي ستایلي چې د دغه پرېکړه لیک مسوده یې چمتو کړې.
فايق ليکلي:« موږ د نړیوالو اصولو پر بنسټ د سولې د ټینګښت، بیا یو ځای کېدو او د افغان ښځو د ځواکمنولو په برخه کې ستاسو د ژمنو ستاینه کوو او د افغانستان د روښانه راتلونکې په جوړولو کې ستاسې هڅې اغېزمنې دي.»
بل لورته یاد سازمان کې د روسیې د دایمې استازي په یوه اعلامیه کې د امنیت شورا د مسودې هرکلی کړی، خو ویلي یې دي چې دا لارښونې باید په زغم او د اسلامي امارات په مشوره ترسره او خبرې پرې وشي.
د بشري حقونو د څار سازمان د ښځو برخې مشرې هیدر بار د روسیې استازي پر دریځ نیوکه کړې او د پوښتنې مطرح کولو په توګه یې ويلي چې روسيې د افغان نجونو زده کړو په اړه تراوسه له اسلامي امارات سره د خبرو لپاره کومه هڅه کړې؟
د ملګرو ملتونو امنیت شورا ۱۵ دايمي او غیر دايمي غړو پرون جمعه د رایو په اکثریت په افغانستان کې له سرپرست حکومت سره د تعامل د څرنګوالي په اړه دا پرېکړه لیک تصویب کړ.
د پرېکړه لیک مسودې ته ۱۳ مثبتې او د روسیې او چین له خوا سپینې رايې وکارول شوې.
خو اسلامي امارات د ملګروملتونو امنيت شورا ياد پريکړه لیک غيرعادلانه او له واقيعتونو لرې بللی دی.
