د ولسي جرګې د چهارشنبې ورځې عمومي غونډه کې وکیلانو د کرونا ویروس لپاره د حکومت له خوا بودجه کې د راغلو تعدیلاتو په تړاو بحثونه وکړل او تر بحثونو وروسته یې په غوڅ اکثریت رد کړل.
څه موده مخکې حکومت د ۱۳۹۹ کال بودجه کې یو لړ تعدیلات رامنځ ته کړي و او د ځینو پروژو پیسې یې کرونا ویروس سره د مبارزې برخې ته ځانګړې کړې وې چې ولسي جرګه کې پرې بحثونه وشول او نن وکیلانو دغه تعدیلات رد کړل.
وکیلان وايي، له دې امله یې ملي بودیجه کې د کرونا سره د مبارزې په پلمه تعدیلات رد کړي چې ګنې فساد به وشي او خدمات به وړاندې نه شي.
په دغو تعدیلاتو کې اته میلیارده افغانۍ د کرنې او مالدارۍ وزارت برنامو ته او دغه راز شپږ میلیارده افغانۍ د ډوډۍ ویش ته ځانګړې شوې دي.
د ۱۳۹۹ مالي کال بودجه ۴۲۸ میلیارده افغانۍ ده چې ۲۸۹ میلیارده یې عادي او ۱۳۹ میلیارده یې پرمختایي بودجه ده.
