د کونړ والي او ځایي خلکو په هڅو د ځنګلي پړانګ درې بچي وژغورل شول.
د پړانګ دغه بچي د کونړ ولایت د ماڼوګي ولسوالۍ د شوړیک درې په ځنګلونو کې نیول شوي د کونړ والي، امنیتي ارګانونو او ځایي خلکو په هڅو له سیمې انتقال او د چاپیریال ساتنې ملي ادارې د لارښونو سره سم به، ملي ژوبڼ او یا هم ځنګل لرونکو سیمو کې خوشې شي.
کونړ ولایت چې ډېری سیمي یې ځنګلونه لري، د ځنګلونو وهلو، جګړو او بمباریو له امله ځنګلي ژویو نورو سیمو ته کډه کړې، خو په لیرې پرتو سیمو کې اوس هم بېلابېل ډولونه شتون لري، خو تر دې دمه یې د ناقانونه ښکار مخه نده نیول شوې.
ځایي خلک بیا وایي ځنګلونو کې اوس هم داړونکې ژوي شته او وخت ناوخت د دوی د مالونو په رمو یرغل کوي.
د کونړ والي عبدالستار میرزکوال وایي د خدای او ولس پر وړاندې د دې ولایت د جغرافیې ساتلو مسوولیت لري، د امنیت نیولي، تر پرمختیایي چارو، ځنګلونو بیا احیا، قاچاقو مخنیوي او د ځنګلي ژویو د ساتلو په برخه کې به خپل مسوولیت ادا کړي.
نوموړي د سیمې د خلکو هم مننه وکړه، چې د یادو ژویو په سپارلو کې یې ورسره همکاري وکړه او د ملي مسوولیت له مخې یې دولت ته وسپارل.
