له درې شپو راهیسې وسله والو طالبانو د فاریاب ولایت د قیصار ولسوالۍ پر امنیتي پوستو پراخ بریدونه کړي دي چې په پایله کې یې درې امنیتي سرتیري او ۱۷ طالب وسله وال وژل شوي دي.
په فاریاب کې سیمه ییز چارواکي وايي چې تېره امنیتي ځواکونو د دغه ولایت په قیصار ولسوالۍ کې د طالبانو دریم برید هم پر شاه تمبولی دی چې په پایله کې يې ۱۷ طالبان وژل شوي دي.
د فاریاب د پولیسو ویاند کریم یورش وایي، وسله والو طالبانو تېره شپه د دریم ځل لپاره د قیصار ولسوالۍ د ارضلیک او بلال بیک په کلیو کې پر امنیتي پوستو بریدونه وکړل چې له سخت مقاومت سره مخ شوي دي.
د یورش په وینا، د امنیتي ځواکونو او طالب جنګیالیو ترمنځ د نښتو په پایله کې د طالبانو د سرې قطعې د څو تنو مشرانو په ګډون ۱۷ طالب وسله وال وژل شوي دي او پنځه نور ټپیان دي.
د فاریاب د پولیسو ویاند دغه راز وایي چې په دغو نښتو کې درې امنیتي سرتیري هم وژل شوي او هیڅ ملکي کس ته زیان نه دی اوښتی.
دا په داسې حال کې ده چې په فاریاب کې سیمه ییز چارواکي وايي چې په دې وروستیو کې په فاریاب د طالبانو له لوري په بریدونو کې زیاتوالی راغلی دی.
