د ایران بهرنیو چارو وزارت په دغه هېواد کې افغان سفیر ورغوښتی.
د ایراني رسنیو دمالوماتو له مخې، د ایران بهرنیو چاور وزارت عبدالغفور لېوال له دې امله ورغوښتی چې ګنې په کابل کې ددوی سفارت مخې ته لاریون ولې شوی دی.
د لوېديځې اسیا هېوادونو لپاره د ایران بهرنیو چارو وزارت استازي سید رسول موسوي افغان سفیر سره د ایران اندېښنې شریکې کړي.
موسوي ویلي، په کابل کې د ایران سفارت مخې ته لاریون کې هغو کسانو برخه درلوده چې پر وینا یې د ایران او افغانستان ښو اړیکو مخالف دي.
افغان حکومت تراوسه په دې تړاو څه نه دي ویلي.
څو ورځې وړاندې په کابل کې د همبستګۍ ګوند د ایران سفارت مخې ته لاریون کړی او د ایران سفارت لوحه یې په سور رنګ ووېشتله.
ګوند وروسته له هغې لاریون وکړ چې ایراني ځواکونو د افغان کډوالو پر موټر ډزې وکړې او یو شمېر افغانان په کې وسوځېدل.
