د ماشومانو لپاره د ملګرو ملتونو ملاتړې ادارې یونیسف ادارې د نړیوال بانک له لوري د افغانستان له عامې روغتیا وزارت سره د ۵۰ ټنه روغتیايي توکو د مرستې خبر ورکړی دی.
یونیسف په خپله اعلامیه کې لیکلي، د نړیوال بانک په دې بسته کې ۵۰ ټنه روغتیایي توکي ځای پر ځای شوي چې ۱۵۰ زره محافظتي تجهیزات پکې شامل دي او هغه کسان به ګټه ترې واخلي چې له کرونا ویروس سره د مبارزې په لومړۍ کرښه کې پر دندو بوخت دي.
په اعلامیه کې دغه راز راغلي چې اوسمهال په افغانستان کې شپږ سلنه روغتیایي کار کوونکي پر کرونا ویروس اخته شوي.
په ورته وخت کې، په افغانستان کې د نړیوال بانک رییس هنري کیرالي ویلي، دا چې په افغانستان کې د کرونا ویروس مخ په ډېرېدو دی، دا مرسته شوي توکي به د روغتیایي کارکوونکو په ساتنه کې مهم رول ولري.
عامې روغتیا وزیر احمد جواد عثماني د نړیوال بانک له دغو مرستو مننه کړې او وایي، په ټولو روغتیايي مرکزونو کې د معیاري خدمتونو وړاندې کول د وزارت مهم پرګرامونه دي.
