د امریکا د بهرنیو چارو وزیر وایي، امریکا به هیڅکله د جرمونو نړیوالې محکمې ته د پلټنو اجازه ورنه کړي.
د امریکا بهرنیو چارو وزیر مایک پمپیو تیره ورځ وویل، نړیواله جنايي محکمه په اداري فساد اخته ده او د امریکا هغه ځوان سړي او ښځې په نښه کوي چې له قانون سره سم یې د نړۍ د یوه لوی مدنیت لپاره جګړه کړې.
پمپیو چې په امیرکن انټر پرایز انسټیټیوټ کې یې خبرې کولې وویل، موږ به هیڅکله نړیوالې جنايي محکمې ته د پلټنو اجازه ور نه کړو.
د امریکا دې لوړپوړي ډیپلومات په داسې حال کې خبرداری ورکړی چې نړیوالې جنايي محکمې خپلو څارنوالانو ته په افغانستان کې د طالبانو، افغان ځواکونو او امریکا د استخباراتي ادارې د احتمالي جنګي جنایتونو په اړه د پلټنو اجازه د روان ۲۰۲۰ کال په مارچ میاشت کې ورکړه.
