ټاکل شوې ده د راتلونکې ۲۰۲۴ کال په فیبرورۍ میاشت کې د پاکستان پارلماني ټاکنې ترسره شي او سر له اوسه د دې هېواد مطرح ګوندونه ورته د چمتووالي په هڅه کې دي.
سياسون پر يوه او بل تورونه پورې کوي او په يوه تازه مورد کې، د پاکستان پخواني ولسمشر اصف علي زرداري مخکېنی زنداني لومړی وزیر عمران خان تورن کړی، چې په تېرو ټاکنو کې يې له افغان کډوالو ناوړه استفاده کړې.
زرداري په يوه مرکه کې د افغان کډوالو د اېستلو په اړه د عمران خان دريځ ته په اشارې ويلي، چې نوموړی له دې کبله له افغانانو ملاتړ کوي، چې تېرو ټاکنو کې يې د رايې ورکوونکو په نوملړ کې ځای پر ځای کړې وو او په دې توګه يې له نوموړي سره واک ته په رسېدو کې همکاري کړې.
زرداري زیاتوي:« عمران خان ځکه د افغانانو ملاټر کوي، چې د رایې ورکونکو جعلي لیستونه یې جوړ کړي ول او په هغو لیستونو کې افغان کډوال د پاکستان اصلي اتباع ياد شوي ول.»
پاکستان کې ځینې خبریالان د زرداري دا ادعا له حقیقته لرې بولي او وايي، سياسون د عامه اذهانو د مديريت په موخه وخت ناوخت ورته ادعاوې کوي.
پاکستان کې ازاد خبریال طاهر خان وايي: « په پاکستان کې سیاسي مشران کله نا کله داسې خبرونه خپروي چې له هغې خپلې سیاسي ګټې یا موخې ترلاسه کړي او د مخالف په اړه شکونه پيدا کوي، نو د پاکستان پیپلز پارټۍ د مشر اصف علي زرداري ادعا د عمر خان په اړه، چې وايي د ۲۰۱۸ کال په ټاکنو کې عمرخان افغانانو ته اوټونه جوړ کړي وو چې ده ته رایې ورکړي، زما په نظر دا خبره ناسمه ده.»
د سیاسي چارو شنونکي هم د زرداري ادعا بې بنسټه بولي او وايي، عمران خان غوښتل د خپل حکومت پرمهال له افغانانو سره ښې اړیکې ولري، خو په خبره يې د نوموړي دا کار د پاکستان د پوځ لپاره د منلو وړ نه وه.
خو ځېنې نور بیا پر دې باور دي چي په پاکستان کې له افغان کډوالو سیاسي استفاده کیږي او په خبره يې د ورته ادعاوو په کولو سره پاکستاني سياسون خپلې موخې تعقيبوي.
د سیاسي چارو شنونکی ویس ناصري وايي: « د افغانانو په اړه د پاکستان دا ډول خیانتونه، چې له افغانانو د ابزارو په ډول ګټه اخلي او خپلو سیاسي موخو ته ځان رسوي، د افغان کډوالو له مجبوریتونو ناوړه ګټه اخېستل دي. دا کار له تېرو ۴۵ کلونو راهېسې روان دی، د مېرمن بوټو او زرداري د ګوند په ګډون ټولو سیاسي ګوندونو د افغانستان له تحولاتو او له کډوالو ناوړه ګټه اخېستې.»
د عمران خان په اړه د اصف علي زرداري دا ادعا داسې مهال ده، چې تېره اوونۍ د پاکستان مخکېني لومړي وزير عمران خان له خيبرپښتونخوا او پاکستان څخه پر زور د افغان کډوالو اېستلو په اړه د پاکستان د سرپرست حکومت پر پرېکړې نيوکه کړې وه.
