پلازمېنه کابل کې د هدفي وژنو لړۍ پراخه شوې او اندیښنې یې زیږولې دي.
تازه د کورنیو چارو وزارت پریکړه کړې چې د کابل د حوزو هغه امرین او نور سیمه ییز مسوولین به له دندو ګوښه کړي چې په سیمو کې یې موټر سایکل سپاره بریدګر په هدفي وژنې بریالي شي.
چارواکي وايي د دولسمې حوزې یوشمېر مسولین یې په همدې موخه له دندو ګوښه کړي چې تیره ورځ موټر سایکل سپرو کسانو دیادې حوزې اړوند ساحه کې دوه پولیس په ډزو ووژل او په تېښته بریالي شول.
کورنیو چارو وزارت په ښار کې د موټر سایکل په ګرځېدو بندیز لګولی خو لا عملي شوی ندی او نه یې مخه نیول شوې ده.
دا لومړۍ پېښه نده چې په کابل ښار کې ترسره کېږي بلکې له دې وړاندې د هدفي وژنو لسګونه پېښې ثبت شوي چې د موټر سایکل سپرو لخوا ترسره شوې دی.
همدا تېره شپه هم د کابل په دولسمه حوزه کې د موټر ساېکل سپرو بریدګرو لخوا دوه تنه په ډزو وژل شوي او بریدګر په تېښته بریالي شوي دي.
د کورنیو چارو سرپرست وزیر مسعود اندرابي ویلي چې له دغې پېښې وروسته یې د د ولسمې حوزې یو شمېر مسولین له دندو ګوښه کړي او ګواښ یې کړی چې د حوزو هغه مسوولین به له دندو ګوښه کړي چې سیمو کې یې هدفي وژنې کېږي.
کورنیو چارو وزارت د موټر سایکل په تګ راتګ هم څو ځلې بندیز لګولی خو دلنډې مودې لپاره عملي شوی.
که څه هم د وزارت دغه اقدام د عامو خلکو له هرکلی سره مخ شوی خو لا پولیس ندي توانېدلي چې ښار کې د موټرسایکلو د ګرځولو مخه ونیسي.
