د کورنیو چارو وزارت سرپرست سراج الدین حقاني د دې وزارت اړوند ادارو له رئیسانو سره کتنه کې ویلي، اړوند مسوولین باید د راتلونکي کال تشکیلاتو ته بشپړ چمتووالی ولري.
حقاني له خلکو سره پر ښه چلن ټینګار و کړ او په خبره یې مسوولین باید خپلو چارو ته پام وکړي او پر وخت خپلو ورسپارل شویو دندو ته رسېدنه وکړي.
حقاني زیاتوي: « دا دوه یا څه باندې دوه کاله ستاسې د اخلاص برکت دی، چې ډېر ښه پرمختګونه لرو او تر اوسه داسې کومه بې کفایتي او کمزورتیا موږ ونه لېدله چې موږ تر پوښتنې لاندې راشو او نه کومه داسې کمرنګي راغلې، چې دا هر څه ستاسې د اخلاص پایله او برکت دی. همداشان د کورنیو چارو وزارت د هېواد پر کچه د خدماتو ځای دی او ډېر ستړی ځای دی، که دلته یوه ذره غفلت هم وشي؛ په ډېرو برخو منفی اغېز کوي.»
حقاني وايي، که څه هم ډېرو د هېواد او ملت په نوم سياست وکړ، خو په خبره یې ونه توانیدل چې هېواد ته رښتینی خدمت وکړي.
حقاني د وزارت اړوند رئیسانو ته په ټینګار سره ویلي چې ښه همغږي زیاته کړي او یوازینی مکلفیت چې د خلکو او نظام خدمت دی چې ترسره یې کړي.
حقاني زیاتوي: « که خپل افعال او اقوال په ښو اخلاقو برابر کړو؛ نو دا بیا نه ماتېدونکي خلک دي او نه ماتېدونکی لښکر به وي. دغه وزارت له موږ سره یو امانت دی. موږ دلته موقتي راغلي یو. دا زموږ ملکیت نه دی. موږ باید داسې ونه وايو چې فلانی زما په کارونو کې لاسوهنه کوي، دا زما کار دی او بل یې څه کوي چې زما په کار کې کار لري، دا اداري کارونه باید زموږ او ستاسې ترمنځ د داسې خفګان او ګیلو لامل ونه ګرځي، چې په ټولو کارونو او برخو منفي اغېز وکړي.»
د کورنیو چارو سرپرست وزیر دې ناستې ته په وینا کې د وزارت اداري کار کوونکو له لوري ولس سره ښه چلن او په ښه توګه د چوپړتیاوو ترسره کېدل وستایل او په وینا یې سره له دې چې د چارو ترسراوي په برخه جدي نیمګړتیا نه لیدل کیږي، خو د لا ښه ترسراوي په یې موخه یې پر لا هڅو ټینګار و کړ.
په دغه ناسته کې د کورنیو چارو وزارت اداري مرستیال مولوي نور جلال جلالي په خپلو خبرو کې وویل، پر وخت چارو ته رسیدل، له خلکو سره ښه چلن او تعامل د نظام د پایښت ضمانت کوي او له مسوولینو یې وغوښتل چې له مامورینو سره ښه چلن وکړي او مامورین باید په بشپړه توګه د خپلو مشرانو اطاعات و کړي.
