پښتون ژغورنې غورځنګ له نړیوالو بشري ټولنو وغوښتل چې پاکستان دې د پښتنو له وژنو وګرځوي.
د یاد غورځنګ غړو تېره ورځ ناوخته د وزیرستان په جاني خېلو کې د لاریون په ترڅ کې یو وار بیا له نړيوالو وغوښتل چې پر پاکستان دې فشار راوړي څو د پښتون نسل وژنې لاس واخلي.
لاریون کوونکو د پاکستان حکومت تورن کړی چې هدفي وژني کوي او د غورځنګ فعاله کسان په نښه کوي.
دا لاریون په داسې حال کې شوی چې تېرو دوه ورځو کې هم بیلابیلو سیمو کې د پښتون ژغورنې غورځنګ څو غړي د نامالومو کسانو له لوري په نښه شوي دي.
یاد غورځنګ وایي، وسله وال نامالومه نه دي، بلکې ښکاره ګرځي، خو پوځ او پولیس يې نه نیسي.
