د امریکا موندنې ښيي چې د کابل او ننګرهار بریدونه داعش ډلې کړي.
د افغان سولې لپاره د امریکا ځانګړي استازي زلمي خلیلزاد ویلي، چې داعش د سولې پروسې دوښمنه ډله ده او له رامنځته شوي فرصت څخه باید افغانان ګټه پورته کړي.
امریکا د وروستیو بریدونو په تړاو د حکومت ادعاء خلاف نظر خپور کړی او وروستي بریدونه یې د داعش کار یاد کړی دی.
زلمي خلیلزاد ویلي د امریکا ارزونه ښي چې بریدونه داعش کړي او دغه ډله یې د سولې دوښمنه بللې ده.
حکومت د دې بریدونو تر شاه طالبان ګرم ګڼلي او له همدې امله یې د تعرضي بریدونو امر کړی دی.
خو طالبانو یو ځل بیا د کابل او ننګرهار خونړیو بریدونو کې خپل لاس لرل رد کړي او د لا روښانتیا لپاره یې د څېړنې غوښتنه کړې ده.
خلیلزاد ویلي د دې ډلې د ماتې لپاره افغانان باید یو شي او د نباید د سولې خبرو لپاره نورې پلمې پيدا شي.
خلیلزاد داسې ویلي (( داعش-خراسان همداراز د افغانستان د اسلامي جمهوریت او طالبانو تر منځ د سولې د یوه تړون مخالفت کوي، او هڅه کوي چې د عراق او سوریې په څیر فرقوي جګړه راپورته کړي. دداعش دوام ته د لویدلو او د سولې د ځنډولو یا ورته د خنډونو د جوړولو پر ځای، افغانان باید سره راغونډ شي چې دغه ګواښ ته ماتې ورکړي او د سولې د تاریخي فرصت پسې ورشي. نورې پلمې نشته. افغانان، او نړۍ، تر دې د ښو مستحقه دي.))
طالبانو یو ځل بیا ددې بریدونو غندنه کړې او د کابل او ننګرهار بریدونه یې جنایت او ستر وحشت یاد کړی.
طالبانو داسې ویلي ((موږ کلکه غوښتنه کوو چې د دغو بریدونو په اړه دې په جدي او شفاف ډول بې طرفه څیړنه وشي، ترڅو د دغو سترو جنایاتو د عاملینو له تورو مخونو څخه پرده پورته او کلک حساب کتاب ورڅخه واخستل شي.))
حکومت د بریدونو تر شاه طالبان ګرم ګڼلي او ډاډ يې ښودلی چې چاته به اجازه ور نه کړي چې میندې او اولادونه یې شهیدان کړي.
له برید وروسته حکومت او طالبانو پر یو بل د بریدونو او تلفاتو اړولو ادعاووې کړې دي.
له دې بریدونو وروسته حکومت د تعرضي عملیاتو اعلان وکړ چې طالبانو همهاله پکتیا کې موټر بم برید وکړ چې ۳۰ کسانو ته یې مرګ ژوبله واړوله.
