د طالبانو یوه بله ۹۸ کسیزه ډله بندیان د څرخي پله له زندان خوشې شول.
که څه هم د بندیانو خلاصون د بین الافغاني خبرو د پیل، باور او حسن نیت لپاره اساسي ګام بلل کېده خو اوس هر څه د تمې خلاف روان ښکاري.
د سیاسي بندیانو د ازادېدو بهیر پیل شوی خو کرار خلاصون یې د جګړو په سنګرونو اغیز نه دی کړی. د جګړو د دوام او شدت یو لامل د بندیانو خلاصون د مېکانیزم خلاف بلل کیږي.
د طالبانو د واکمنۍ لوی څارنوال جلال الدین شینواري داسې وویل (( کوم طالب بندیان چې د دولت لخوا خوشې کیږي دا یو نیک او ښه کار دی اما، خو د شوې هوکړه لیک سره مطابقت نلري له بلې خوا نه د طالبانو د هئیت د اشراف او نظر لاندې نه خوشې کیږي چې دا یوه ستونزه ده. اما امیدواري شته دی چې د طالبانو د لیست مطابق پنځه زره بندیان که خوشې شي امیدواري شته چې بین الافغاني مذاکرات شروع شي.))
د طالبانو او امریکایانو له هوکړې وروسته د طالبانو لخوا تر ډېره مخامخ او یا په پوستو ډله اییز بریدونه کېدل، دغه راز حکومت بیا دفاعیه کې هوایي بریدونه کول.
له څو ورځو را پدېخوا د جګړو تکتیک بدل شوی تازه پېښه هلمند ولایت کې د طالبانو موټر بم برید دی چې شاوخوا ۲۵ سرتېرو ته پکې مرګ ژوبله اووښتې ده.
په ورته وخت کې پکتیکا کې یو جومات ته لاسي بمونه غورځول شوي چې شل لمونځ کوونکي یې ټپيان کړي دي.
د جګړې په ښکېلو اړخونو نیوکې دي چې د بین الافغاني خبرو پیل لپاره مړې هڅې کوي چې د دې وضعیت دوام شته ستونزې لا پراخولی شي.
حکومت وایي، تر اوسه ازاد شوي بندیان د حسن نیت لپاره دي او له طالبانو هم غوښتنه لري.
د ارګ ویاند صدیق صدیقي داسې وویل (( په تیرو څو وروستیو اونیو کې د طالبانو لخوا د بریدونو زیاتېدو خلک د سولې په پروسې بې باوره کړي. خو افغان حکومت ته اوس هم سوله لومړیتوب لري او سولې ته ژمن یوو.))
حکومت همدا تېره ورځ ناوخته د طالبانو ۹۸ نور زندانیان د څرخي پله له زندان ازاد کړي او په دې سره د خوشې شویو طالب زندانیانو شمېر ۷۴۸ ته ورسید چې اوه نیم سوه نور به هم خوشې کړي.
طالبانو هم تر اوسه یو سلو لس بندیان خوشې کړي او ژمنه یې کړې چې د مقابل لوري اقداماتو ته په کتو به ګام اخلي.
