په متحده عرب اماراتو کې د اقلیم بدلون ۲۸مې ناستې په تړاو تازه په افغانستان کې د ملګرو ملتونو سياسي استازولۍ )یوناما( ویلي، افغانستان د اقلیم بدلون له اغیزو څخه د لسو تر ټولو زیانمنونکو هېوادونو په ډله کې دی.
د يوناما له لوري په خپره شوې خبرپاڼه کې ويل شوي، د افغانستان له نیمايي زیات وګړي وچکالۍ، زلزلو، او نورو اقتصادي ستونزو ځپلي او له بېړني وضعیت سره مخامخ دي.
د خبرپاڼې یوه برخه:« د اقلیم بدلون لپاره په افعانستان کې زموږ مالي مرستې کافي نه دي، نړیوالې مالي منابع تړل شوي او څوک نشته چې د اقلیم په نړیوال فورم کې د دې هېواد استازولي وکړي. واکمنو چارواکو هم د یوې منسجمې حکومتولۍ چاپېریال نه دی رامنځته کړی.»
بل خوا د افغانستان لپاره د ملګرو ملتونو د سرمنشي ځانګړې استازې روزا ا وتنبایوا وايي، د اقلیم بدلون برخه کې د افغانستان روان وضعیت د زغم وړ نه دی او په خبره يې یوناما هڅه کوي، څو دې ناوړه وضعیت ته د حل لاره پیداکړي.
هغې زیاته کړې:« دا وضعیت د دوام وړ نه دی. همدارنګه د اقلیم له بدلون سره انعطاف ته انتظار نه شي کېدای. ټول اړخونه باید په غیر سیاسي او رغنده توګه د افغانانو د ګټو لپاره د دې مسئلې د حل لپاره پر ګډه کار وکړي.»
د سیاسي چارو یو شمیر کارپوهان وايي، افغانستان د نړۍ جغرافیه یوه برخه ده او نړیوال دې د خپل مسوولیت له مخې له دې هېواد سره مرستې وکړي.
دوی ټينګار کوي د ورته ستونزو د اسانه حل کولو په موخه دې سرپرست حکومت هم له نړۍ سره تعامل ته د رسېدو لپاره معقولې حللارې پيدا کړي.
د سیاسي چارو کارپوه عزیز معارج وايي:« افغانستان هم د نړۍ د جغرافیه یو جز دی، که چېرې دلته اقلیمي بدلون راځي هرومرو د سیمې په هېوادونو او نړۍ خپلې اغېزې لري، نو نړیوال باید یوازې خبرې ونکړي هم دې په اقلیمي غونډو کې افغانستان ته ګډون ورکړي او هم دې په دې برخه کې مرستې وکړي، همداشان طالبان دې هم د یوه مسوول حکومت په توګه کوټلي ګامونه واخلي، نړۍ سره دې د تعامل لاره برابره وکړي.»
د اقلیم بدلون ۲۸مې ناستې په تړاو د چاپیریال ساتنې ملی ادارې ویلي، په هغو نړیوالو ناستو کې چې د اقلیم بدلون په اړه بحث او له زيانمنو هېوادونو سره مرستې کېږي، د افغانستان د استازي نه وربلل د افغانستان په حق کې تېری دی او بايد ونډه او رول يې له پامه ونه غورځول شي.
