د خوړو نړیوال پروګرام (ډبلیو.ایف.پي) په یوه راپور کې ویلي، په بېړني ډول ۲۷.۵ میلیونو ډالرو ته اړتیا لري، څو له پاکستانه افغانستان ته د یو میلیون راستنېدونکو افغان کډوالو سره مرستې وکړي او له را روان ساړه ژمي یې وژغوري.
راپور کې ویل شوي، د بودیجې کمښت له امله نه شي کولی چې له پاکستانه تازه راستنېدونکو افغان کډوالو ته بشپړ لاسرسی ولري او پرته له ځینو لومړنیو اساسي توکو ورسره مرسته وکړي.
د افغانستان لپاره د خوړو نړیوال پروګرام مشره شیوی لي وايي:« موږ په بېړنۍ توګه ۲۷.۵ میلیونه ډالرو ته اړتیا لرو، څو له یو میلیون راستنېدونکو سره مرسته وکړو، چې له سخت ژمي ژوندي پاتې شي؛ ځکه چې سخت ژمي ته یوازې څو اوونۍ پاتې دي او افغانستان لاهم د ویجاړوونکو زلزلو، یو ځپل شوي اقتصاد او د اقلیم د خرابېدو بحران او کړکېچ سره مخ دی.»
د افغانستان لپاره د ډبلیو.ایف.پي مشرې خبرداری ورکړی چې دغه پروګرام اړ شوی چې له لس میلیونه افغانانو سره د خوراکي توکو بېړنۍ مرستې کمې کړي.
له دې سره د اقتصادي چارو کارپوهان د اوسني سرپرست حکومت پر مرستو سربېره، له پاکستانه راستندېدونکو افغان کډوالو سره د نړیوالو او د بشري سازمانونو مرستې مهمې بولي.
د اقتصادي چارو کارپوه سید مسعود وايي:« افغانستان چې په کومو اقتصادي شرایطو کې دی او له نړۍ سره چې زموږ کوم ناوړه سیاسي اړیکې دي، نو نشي کولی ۳۰۰ زره یا ۳۵۰ زره کسان چې افغانستان ته دننه شوي، دوی تغذیه کړي. ملګرو ملتونو چې دغې برخه کې د ۲۷ میلیونو ډالرو غوښتنه کړې دا باید پرځای شي او د دوی ترڅنګ اسلامي پراختیايي بانک هم باید ونډه واخلي څو شته کړکېچ حل شي.»
ملګري ملتونه وايي، په پاکستان کې ۱.۳ میلیونه بې اسناده افغانان ژوند کوي، چې د ۲۰۲۴ زیږدیز کال تر جولای میاشتې پورې به په سرحدي او فرضي صفري نقطو کې ملاتړ ته اړتیا ولري.
له دې سره د پاکستان لنډمهالي حکومت د کورنیو چارو وزیر سرفراز بوګټي له یوې پاکستانۍ رسنۍ سره په تازه خبرو کې ویلي، چې تر راتلونکې یوې میاشتې به له پاکستانه د ناقانونه کډوالو اېستلو بهیر بشپړ شي.
