د طالبانو له لوري د افغان حکومت شل تنه خوشي شوي زندانیان سره صلیب ته په کندهار کې سپارل شوي.
افغان حکومت تر اوسه په درېو پړاوونو کې د طالبانو درې سوه زندانیان خوشي کړي دي.
د بین الافغاني خبرو د پیل لپاره د بندیانو خلاصون کلي بلل کیږي هغه چې اوس دواړو لورو د زندانیانو د ازادۍ لپاره اقدامات پیل کړي.
د حکومت تر عملي اقدام وروسته طالبانو هم د شلو تنه بندیانو د خلاصون پرېکړه اعلان کړه.
قطر کې د طالبانو سیاسي دفتر ویاند سهیل شاهین داسې ویلي (( نن به د اسلامي امارت لخوا د حکومت شل تنه بندیان له زندان څخه خوشې او د کندهار په ولایت کې به د سره صلیب ادارې ته وسپارل شي))
افغان حکومت بیا تر اوسه درې سوه طالب بندیان ازاد کړي چې وروستی اقدام یې د یکشنې په ورځ د سلو نورو بندیانو خلاصون دی.
د افغانستان د بشر حقونو سازمان وایي، د بندیانو خلاصون باید سمبولیک نه وي عملا باید د خبرو د پرمختګ او د جګړې په کمښت اغیز او اوربند ته لاره خلاصه کړي.
ویل کیږي تر اوسه چې حکومت کوم بندیان خوشې کړي د هغو پنځه زره کسانو د لېست له ډلې دي چې له امریکایانو سره په دوحه کې پرې هوکړه شوې ده.
د امریکا د هوکړې له مخې حکومت باید پنځه زره طالب بندیان خوشې کړي او د حکومت په زندانونو کې لږ تر لږه پنځلس زره طالبان بندیان دي.
طالبانو بیا ویلي چې دوی د پنځه زره بندیانو په بدل کې زر تنه حکومتي کسان خوشې کوي خو کره معلومات نشته چې له طالبانو سره څومره کسان بندیان دي.
باور دا دی چې د بندیانو دوه اړخیز خلاصون د پیچلي وضعیت غوټه خلاصولی شي.
