له افغان کډوالو سیاسي ګټه اخېستنه او د فشار په توګه یې استعمال ، دافغان سوداګرو پر وړاندې ستونزې جوړول او د ترانیزیت پر وړاندې یې د بندرونو تړل او پر افغانستان د ترهګرۍ ملاتړ تورونه پورې کول د کابل پر وړاندې د اسلام اباد هغه وروستي سیاسي فشارونه دي چې خپلو موخو ته د رسیدو لپاره یې کارولي دي.
د سیاسي چارو کارپوهان په دې باور دي چې پاکستان غواړي د سیاسي فشارونو ورادولو له لارې د افغانستان سیاسي او اقصتادي پالیسي ترخپل اغیز لاندې راولي.
د دوی په خبره، اسلام اباد هڅه کوي چې افغان لوری خپل تابع وګرځوي او نړۍ د پاکستان له عینکو افغانستان ته وګوري.
د پوهنتون استاد فیض محمد ځلاند وايي: « پاکستان په افغانستان کې دوه مخی سیاست پرمخ وړي، پاکستان هڅه کوي چې کابل خپل تابع وګرځوي، د کابل سیاسي، اقتصادي او ټولنیزه پالېسي باید د اسلام اباد تر اغېزې لاندې وي. ماته ښکاري په دې وروستیو کې پاکستان هڅه وکړه چې فشارونه زیات کړي ترڅو د طالب حکومت او د اسلامي امارت چارواکي تر خپلې اغېزې لاندې راولي او د دوی غوښتنو ته سر ښکته کړي او په ټوله کې نړۍ د پاکستان له عینکو افغانستان ته وګوري.»
کارپوهان وايي، پاکستان فکر کوي چې د سیاسي فشارونو پرمټ به افغان لوری دې اړباسي چې د دوی غوښتنې ومني.
دوی وايي، د افغانستان پر وړاندې د پاکستان له وروستیو دریځونو او سیاستونو داسې ښکاري چې دغه هیواد په کابل کې ځواکمن او خپلواک نظام زغملی نه شي.
د نړیوالو اړیکو کارپوه فضل هادي وزین وايي: « دا اقدام د دې لپاره کېږي چې د پاکستان حکومت غواړي د افغانستان سرپرست حکومت باندې فشارونه زیات کړي ترڅو د پاکستان غوښتنې ومني.»
د سیاسي چارو کارپوه توریالی ځاځی بیا وايي، پاکستان داسې انګیرله چې د اسلامي امارت واک ته له رسیدو سره به تر ډېره کابل د دوی ترسیاسي اغیز لاندې وي خو اسلامي امارت خپلواک او ځواکمن مرکزي نظام جوړکړی چې اوس یې اسلام اباد اندیښمن کړی او د مخالفت لار یې غوره کړې.
د ځاځي په خبره، اسلامي امارت د پاکستان هغه خوبونه په اوبو لاهو کړي چې د جمهوریت له سقوط وروسته یې د افغانستان په تړاو لیدل.
ځاځی زیاتوي: « دوی (پاکستان) پر افغانستان سیاسي فشارونه وارد کړي او هغه خوب یې چې لیدلی و چې کله که اسلامي امارت واک ته ورسېږي د دوی هره غوښتنه به په افغانستان کې ومنل شي؛ خو پاکستان دې دغه ارمان له ځانه سره ګور ته یوسي. اوس د هر افغان مسوولیت دی چې د خپل هېواد په وړاندې تاریخي مسوولیت ادا کړي او هېڅکله اجازه ورنه کړي چې زموږ په خاوره کې پنجاب نوره لاسوهنه وکړي.»
پاکستان د خپل ۷۵ کلن تاریخ په موده کې له افغانستان سره مخالفت کړی او خپلو افراطي ګټې یې پاللي دي.
په ټوله کې د پاکستان په تړاو نظر دادی چې دغه هېواد د ترهګرۍ پالنې او روزنې له لارې خپل ګاونډيان او ان سیمه نا ارامه کړې، خو اوس خپله پړه پر افغانستان اچوي او غواړي چې نړۍ ته د افغانستان ناسم تصویر وړاندې کړي.
