د هرات ولایت د زنده جان ولسوالۍ نایب رفیع او سیا اب کليو کې زلزله ځپلو ته د کورونو جوړولو چارې په چټکۍ سره روانې دي.
مسوولین وایي، یادو دوو کلیو کې د کورونو جوړولو چارې تر ۸۰ سلنه مخ ته تللي.
د دوی په خبره له یادو کورونو ۳۰۰ کوره یي د عزیزي خیریه بنسټ په مالي ملاتړ د ۲۰۰ میلیونه افغانیو په لګښت جوړیږي.
د کلیو او پراختیا وزارت د پلان او پالیسۍ معين شراف الدین مسلم وايي: « ۸۰ سلنه کارونه یې بشپړ شوي. ان شاءالله په نږدې ورځو کې به زیانمنو ته کورونه تسلیم شي. د دې کلي ترڅنګ نور کلي هم دي چې د هغوی کارونه هم نږدې دي چې بشپړ شي او خلکو ته وسپارل شي.»
د هرات اطلاعات او کلتور مشر احمد الله متقي وايي: « له هماغه وخته چې زلزله شوې د زیانمنو ورځنۍ اړتیاوې ورته رسوو او الحمدالله د دوی اړتیاوې پوره کېږي، د خوراک او څښاک توکي ورسېږي، همداشان البسه، لنډمهاله سرپناوې او خیمې ورسېدلي دي. تاسې به یې ووینئ روغتیايي کلینېکونه په هر کلي کې جوړ دي، چې هلته په هره برخه کې د ناروغانو درملنه کېږي او که بیا دلته امکانات نه وو هغوی د هرات ښار ته رسول کېږي، منظم ۲۴ ساعته امبولانسونه موجود دي.»
بل خوا بیا د زلزله ځپلو لپاره د کورونو جوړولو انجنیران د کار د کیفیت په اړه داسي وایي.
انجنیر صدیق الله مصدق وايي: « له یوه ښه او منظم سیستم ګټه اخېستل کېږي، د لوړ کیفیت لرونکي مواد لرو او ډاډ درکوو چې ښه قوي سیستم کارول شوی دی.»
د کورونو جوړولو له چارو سره هم مهاله زلزله ځپلي لاهم سړې شپې په خیمو کې تیروي.
دوی چې له یوې خوا یي د کورنۍ غړي له لاسه ورکړي او له بلې خوا د سرپنا نشتون له امله ژوند کې پرې سخت کړاونه تیریږي، له مسوولینو غواړي چې د ماشومانو ژوند ژغورنې لپاره یې لاسنیوی وکړي.
یوتن زلزله ځپلی امید وايي: « زما څوک پاتې نه دي. یوه خور مې چې هغه هم ټپي شوې، وینې ته یې اړتیا درلوده او اوس یې هم وضعیت خراب دی، کورنۍ چې نه وي، مور نه وي نو ژوند هېڅ دی.»
یوه زلزله ځپلې وايي: « څه مالداري چې وه ختمه شوه، نور نو څه نه لرو هر څه وران او ویجاړ دي»
د یادونې وړ ده چې هرات زندهجان ولسوالۍ نایب رفیع او سیا آب کليو کې شاوخوا ۵۰۰ تنو خپل ژوند له لاس ورکړ چې ډېری یې ښځې او ماشومان ول.
