د طالبانو پنځلس کسیز پلاوی راتګ تر نامالومې نېټې وځنډېد.
طالبانو ته نږدې سرچینې وایي ددغه پلاوي راتګ د تخنیکي ستونزو له امله ځنډېدلی دی.
ټاکل شوې وه چې نن په لومړي ځل شاوخوا ۱۵ طالب استازي کابل ته راشي.
ویل کېږي چې دغه سفر د طالب استازو د شمېر پر سر داختلافاتو له امله ځنډېدلی وي.
طالبانو ته نږدې سرچینې وایي چې سره صلیب د لسو طالب استازو او د سفر خو طالبانو د پنځلس کسانو د راتګ غوښتنه کړې.
طالبانو وړاندې ویلي وو، د دوی یو پلاوی کابل ته ځي او د خپلو بندیانو د خلاصېدو شاهدان به وي.
قطر کې د طالبانو د سیاسي دفتر ویاند سهیل شاهین ویلي و، د دوی پنځلس کسیز پلاوی به بګرام زندان کې د خپل نوملړ په اساس د بندیانو خلاصون ترسره کړي.
سهیل شاهین ویلي و، پلاوی یوازې د بندیانو د خلاصون او د هغوی د تصدیق په موخه کابل ته ځي او دا د بین الافغاني خبرو پیل ندی.
ټاکل شوې وه دغه پلاوی تېره ورځ جمعه کابل ته راشي، خو ویل کېږي د سره صلیب کارکوونکو د رخصتۍ له امله ځنډېدلي دي خو نن یې هم راتګ ونه شو.
