د امریکا د بهرنیو چارو وزیر مایک پمپیو په یو نا اعلان شوي سفر افغانستان ته راغلی.
پمپیو له ولسمشر غني سره په ارګ کې لیدلي، چې دواړو لوریو د سولې پروسې، په دغه بهیر کې راتلونکو ګامونو او د هېواد په امنیتي او سیاسي وضیعت خبري کړي.
بلخوا مخکیني اجراییه رییس ډاکټر عبدالله عبدالله په خپله فیسبوک پاڼه لیکلي، چې له پمپیو سره یې لیدلي او د سولې پروسې د ارزښت او د افغانانو ترمنځ د سیاسي بحران د حل پر اړتیا يې بحث او خبري کړي.
افغانستان ته د امریکا د بهرنیو چارو وزیر مایک پمپیو د ناڅاپي سفر موخه واضح نه ده، خو انګېرل کیږي، چې په هېواد کې روان سیاسي کړکیچ، د طالبان بندیانو خلاصون او بین الافغاني مذاکرات، به هغه مسایل وي، چې پمپیو به یې د حل هڅه کوي.
له ارګ څخه خپره شوې خبرپاڼه کې ویل شوي، چې پمیپیو د ولسمشر غني سره د سولې پروسې او د هېواد د امنیتي او سیاسي وضیعت په تړاو غږیدلی.
اعلامیه کې داسې راغلي ((دواړو لوریو د سولې پروسې، په دغه بهیر کې د راتلونکو اقداماتو او سولې په خاطر د سیمه ییزې اجماع او همدا راز د افغانستان د امنیتي او سیاسي وضعیت په اړه بحث او خبرې وکړې.))
د امریکا د بهرنیو چارو وزیر مایک پمپیو له ولسمشر غني سره له لیدنې وروسته ډاکټر عبدالله عبدالله سره هم لیدلي، چې ښایي، موخه یې د دواړو ترمنځ د جوړجاړي رامنځته کول وي.
عبدالله عبدالله داسې ویلي ((نن له غرمې ورسته مې د امریکا متحده ایالاتو د بهرنیو چارو له وزیر ښاغلي مایک پمپیو سره په سپېدار ماڼۍ کې وکتل. پدې لیدنه کې مو د سولې پروسې پر اهمیت او د افغانانو ترمنځ د سیاسي بحران د حل پر اړتیا بحث او د نظرونو تبادله وکړه.))
له دې وړاندې د افغان سولې لپاره د امریکا د بهرنیو چارو وزارت استازي، د ولسمشر غني او ډاکټر عبدالله عبدالله ترمنځ د جوړ جاړۍ هڅه وکړه، خو بریالی نه شو.
ولسمشر غني عبدالله ته اجرایوي ځای او شریک حکومت چانس نه ورکوي، د طالبانو زندانیان هم پرته له شرط نه خوشې کوي، له همدې کبله خواله رسنیو کې د ځینو تحلیل دا دی چې پمپیو به ولسمشر غني وهڅوي چې دریځ رانرم کړي.
