د نړۍ په ګوټ ګوټ کې د حکومتونو لخوا اعلان شوي احصایې ښیې چې د یکشنبې تر سهاره په کرونا ویروس د اخته کسانو شمیر تر درې سوو زرو څخه اوښتی دی.
د ورلډومیټر اطلاعتي ویب پاڼې لخوا د خپاره شويو شمېرو له مخې، په ۱۸۸ هیوادونو او سیمو کې ۳۰۸۰۰۰ کسان په کرونا ویروس اخته شوي دي چې ۸۱۰۶۵ کسان په چین، ۵۳۵۷۸ په ایټالیا او ۲۶۸۶۳ تنه په امریکا کې په کرونا ویروس اخته شوي دي.
همداراز د کرونا ویروس له امله د مړه شویو کسانو شمیر بیا ۱۳۰۶۸ تنو ته رسیدلی چې تمه کیږي په راتلونکو ورځو کې به دا شمیره لا زیات شي.
دا په داسې حال کې ده چې د فرانسې د خبري اژانس د راپور له مخې په نړۍ کې په کرونا ویروس د اخته کسانو شمیر تر پنجشنبې تر ورځې پورې یوازې ۲۰۰ زره کسان وو، په دې مانا چې یوازې په درې ورځو کې شاوخوا سل زره کسان په دغه ویروس اخته شوي دي.
له بلې خوا، د ایټالیا حکومت په تازه راپور کې ویلي دي چې په تیرو ۲۴ ساعتونو کې په دغه هیواد کې ۷۹۳ کسان مړه شوي دي.
ایټالیا کې د کرونا وېروس مړو شمیر د پنجشنبې په ورځ (د کب 29 مه) د چین څخه زیاد شو.
