د عامې روغتیا وزارت وايي، هرات کې له روغتون ۳۸ تنه ناروغان تښتېدلي دي.
هرات کې په کورونا باندې یو اخته او ۳۷ شکمن ناروغان له روغتون تښتېدلي چې دوه ښځې هم په کې شاملې دي.
د هرات د حوزوي روغتون مشر داکتر ناصر حبیب له شمشاد سره خبرو کې وویل یاد کسان چې شمېر یې ۳۸ تنو ته رسېده نن مازیګر مهال یې د روغتون ښيښې ماتې کړي داکتران یې وهلي ټکولي او له روغتون تښتېدلي دي.
حبیب وايي له روغتون د تښتېدلو کسانو شمېر ۳۸ تنو ته رسېږي او یو تن هغه مریض هم په کې شامل دی چې د معایناتو نتایج یې مثبت وو.
هغه وايي له دې ډلې ١٣ تنه په خپله خوښه پاته شوي دي.
حبیب وویل چې په دغې ډله کې یو شمېر یې سرزوري و چې د روغتون کړکۍ یې ماته کړې او تښتېدلي دي.
