افغانستان کې د کرونا پنځه نورې مثبتې پېښې ثبت شوې.
د عامې روغتیا وزارت ویاند، وحید مایار ویلي، تازه دوه مثبتې پېښې په هرات او یوه په بادغیس او دوه په لوګر کې ثبت شوې دي.
له دې سره افغانستان کې د کرونا وېروس ناروغانو شمېر ۲۱ تنو ته رسېږي.
د ټولو دولتي او خصوصي پوهنتونونو او ښونځیو د تړلو پرېکړه وشوه.
دغه پرېکړه د کرونا ناروغۍ د خپرېدو مخنیوي لپاره د ښوونې او روزنې، لوړو زدهکړو او عامې روغتیا وزارتونو په وړاندیز او د ولسمشر غني په منظورۍ شوې ده.
د شوې پریکړې له مخې د راتلونکي تعلیمي کال پيل د حمل تر دیرشمې ځنډیدلی دی.
ولسمشر غني همدا راز اړونده ادارو ته سپارښتنه کړې چې خلکو ته دې د کرونا ناروغۍ په اړه پوهاوی ډېر کړي او هرات ولایت کې دې د یادې ناروغۍ د مخنیوي لپاره تدابیر زیات شي.
ولسمشر غني د ویډیو کنفرانس له لارې د هرات، نیمرزو، سمنګان، بلخ، کاپیسا او کابل والیانو ته سپارښتنه کړې چې د کرونا ویروس د مخنیوي لپاره دې جدي تدابیر ونیسي.
دغه راز له ټولو دولتې او خصوصي ادارو غوښتل شوي چې د کنفرانسونو، سیمینارونو او نورو سترو غونډو له جوړولو دې مخنیوي وکړي او د خپلو کارکوونکو د خوندېتوب په موخه دې د عامې روغتیا وزارت جوړ کړي وقایوي لارښود مطابق عمل وکړي.
