د ملګرو ملتونو د امنیت شورا د طالبانو او امریکا ترمنځ له هوکړه لیک ملاتړ وکړ.
افغانستان کې د سولې راوستو لپاره د امریکا د بهرنیو چارو وزارت ځانګړي استازي زلمي خلیلزاد پر خپل ټویټر لیکلي، د ملګرو ملتونو د امنیت شورا د هغه تړون چې دوی تیره اونۍ له طالبانو سره لاسلیک کړ او د متحده ایالتونو او افغان دولت ګډې اعلامیې په ملاتړ، د رایو په اتفاق پریکړه لیک منظور کړ.
خلیلزاد لیکلي، د ملګرو ملتونو پریکړه لیک پر طالبانو او افغان دولت غږ کوي چې د اعتماد جوړونې اقدامتو ته دوام ورکړي او د بین الافغاني مذاکراتو په لور چټک حرکت وکړي.
زلمي خلیلزاد په یو بل ټویټ کې لیکلي، ولسمشر غني تېر ماښام یو فرمان خپور کړ چې د راتلونکې شنبې ورځ به د طالبانو لخوا د ورکړل شوي نوملړ پر اساس، تر ۵۰۰۰ طالب بندیان خوشې شي.
هغه لیکلي، طالبانو لا له وړاندې د افغان دولت تر ۱۰۰۰ بندیانو ازادول منلي دي.
خلیلزاد زیاته کړی، دی له دواړو غاړو هیله کوي چې سملاسي د قطر په پلازمېنه دوحه کې خبرو ته کیني او جزئیات وړاندې کړي.
خلیلزاد دا هم ویلي، چې افغان دولت لدې کار سره توافق کړی او په وینا یې پلې کیدل به یې د سولې بهیر کې یو ستر ګام وي.
نوموړي له طالبانو هم هیله کړې چې خپلو ژمنو ته وفادار پاتې شي څو تاوتریخوالی کم شي، بندیان په سمه توګه ازاد شي او د سولې بهیر بریالی شي
