د هرات له زلزله ځپلو سره د عمان لومړنۍ مرستندویه جوپه دغه ولایت کې افغاني سرې میاشتې ټولنې ته وسپارل شوه.
په دغو مرستو کې درمل، خوراکي او غیر خوراکي توکي شامل دي چې وروستۍ زلزله ځپلو باندې به وویشل شي.
د افغاني سرې میاشتې ټولنې عمومي مشر مطیع الحق خالص وايي، د عمان ترڅنګ د یو شمېر نورو هیوادونو مرستې هم دوی ته سپارل شوې او په پام کې ده دغه مرستې په پوره روڼتیا سره هرات کې زلزله ځپلو ته ووېشل شي.
خالص زیاته کړې: « دا د خوښۍ ځای دی چې یوازې زموږ هېوادوالو او نظام نه، بلکې د اسلامي او غیر اسلامي هېوادونو خیریه بنسټونو او حکومتونو موږ سره په دې غمیزه کې غمشریکې کړې، د ډاډګیرنې پیغامونه یې رالېږلي او دوی سره د مرستو په برخه کې یې زموږ لاسنیوی کړی،. موږ له دوی ټولو منندوی یو.»
د عمان خیریه بنسټونو مسوول بدرمحمد علي الز عالی وايي، هرات کې یي د زلزله ځپلو او اړمنو کسانو لاسنیوي په موخه د ۲۵۵ زره عماني ریالو په ارزښت یي دغه مرستې افغانۍ سرې میاشتې ته سپارلي او ډاډ ورکوي چې زلزله ځپلو سره به خپلو مرستو دوام ورکړي.
هغه زیاته کړه:« دغه ۸۰ ټنه مرستې دي. دغو مرستو کې خیمې، درمل، خوراکي او غیر خوراکي توکې شامل دي. موږ دغه مرستې افغان حکومت ته سپارو چې زلزله ځپلو کسانو ته ووېشل شي.»
په همدې حال کې د افغاني سرې میاشتې ټولنې مسوولین وایي، تر اوسه یي ۱۵ زره ۲۲۳ زلزله ځپلو کورنیو نقدي، خوراکي او غیر خوراکي توکي وېشلي دي.
د افغاني سرې میاشتې ټولنې ویاند عرفان الله شرفزی وايي:« تراوسه له ۱۵ زره ۲۲۳ کورنیو سره د افغاني سرې میاشتې له لوري مرستې شوي، چې په دې کې بیا ۵ زره ۱۲۵ کورنۍ هغه دي چې خوراکي توکي ورته وېشل شوي، ۴ زره ۹۳۷ کورنیو ته غیر خوراکي توکي وېشل شوي او ۴ زره او ۷۵۰ هغه کورنۍ دي چې خوراکي او غیر خوراکي توکي ورته وېشل شوې دي، ترڅنګ یې ۴۱۰ کورنیو ته بیا نغدي مرستې هم وېشل شوې دي.»
له دې مرستو سره هم مهاله هرات کې د یوه مخابراتي شرکت له خوا هم یو شمېر زلزله ځپلو کورنیو ته مرستې ووېشل شوې.
د مخابراتي شرکت مسوول سید فاروق سادات وايي: « د دې کمپنۍ په مرسته مو د ۶۰۰ زرو افغانیو په ارزښت توکي پېرلي، چې په دې کې خېمې، کمپلې، کالي، د پخلنځي وسایل او نور توکي شامل وو او زیانمنو ته مو رسولي دی.»
بل خوا زیانمن شوي کسان د دغه مرستو ترلاسه کولو څخه د خوښۍ ترڅنګ د نورو خیریه بنسټونو څخه د لا زیاتو مرستو غوښتنه کوي.
یو تن زیانمن شوی وايي: « په دې پېښه کې زیانمن شوي مرستو ته ډېره اړتیا لري چې په هره برخه کې ورسره مرسته وشي.»
یو بل زیانمن شوی وايي: « له موږ سره باید لا زیاتې مرستې وشي، لکه وریجې، غوړي… ځکه هېڅ خوراکي توکي نه لرو، د کار کولو کسان نه لرو او له سختو ستونزو سره مخ یو.»
دا په داسي حال کې ده چې هرات کې پرلپسې زلزلو خلکو ته د ځاني زیانونو ترڅنګ درانه مالي زیانونه هم اړولي او خلګ په دغه ولایت کې د لا نورو مرستو غوښتنه کوي.
