د عبدالعلي مزاري تلین غونډه باندې برید کې لسګونه تنه ووژل شول.
د عبدالعلي مزاري په پنځه ویشتم تلین غونډه باندې نن له غرمې مخکې شاوخوا یوولس بجې وسلهوالو برید وکړ.
دغې غونډې ته ډاکټر عبدالله عبدالله، محمد محقیق ، حامد کرزی او یو شمیر نور افغان سیاسیون هم ورغلي و.
دغه برید نن له غرمې مخکې څه باندې یوولس بجې د سپکو وسلو پر ډزو پیل شو چې وروسته په کې درندې وسلې هم وکارول شوې.
کورنیو چارو وزارت ویلي، لوړ پوړو افغان سیاستوالو ته مرګ ژوبله نه ده اوښتې خو په دغه برید کې یې د پنځه ویشتو ملکي وګړو وژل او د ۳۸ نورو د ټپي کېدو پخلی وکړ.
برید هغه مهال وشو چې کریم خلیلي د سولې په تړاو خبرې کولې.
دمګړۍ په دشت برچي سیمه کې، چیرته چې دغه مراسم جوړ شوي و د وسله والو او امنیتي ځواکونو ترمنځ نښته ادامه لري.
وسله وال مراسمو ځای ته څیرمه په یوه ودانۍ کې ځای پر ځای شوي دي .
طالبان وايي، په دشت برچې کې د عبدالعلي مزاري پر مراسمو برید کې دوی لاس نه لري.
ولسمشرۍ ماڼۍ دغه بريد غندلی او دا يې د بشريت ضد جرم عمل بللی دی.
په کابل کې د امریکا سفیر راس ویلسن هم د عبدالعلي مزاري د تلین پر مراسمو نننی برید غندلی او د پېښې د قربانیانو له کورنیو سره یې خواخوږي څرګنده کړې ده.
طالبانو په دغه برید کې لاس لرل رد کړي خو تر اوسه یې کومې ډلې مسوولیت نه دی منلی.
