د امریکا او طالبانو تر منځ پټې معاملې افغانستان ته تلپاتې سوله نشي راوستی.
په کابل کې لسګونو افغان ښځو په یوې غونډه کې له طالبانو وغوښتل، چې د رښتينې سولې لپاره دې له افغان حکومت سره د خبرو مېز ته کېني او اورکم ته دې دوام ورکړي.
د سولې او آزادۍ لپاره د ښځو نړیوال نهضت اندېښنه لري، که د امریکا او طالبانو پټې معاملې ښکاره نه شي، د افغان ښځو لاسته راوړنې به له منځه لاړې شي.
دغه ښځې د هغې اونۍ په خوښۍ راټولې شوي، چې د انسان وینه تر بل هر وخته په کې کمه وبهیده.
د سولې او ازادۍ لپاره د ښځو نړیوال نهضت د امریکا او طالبانو ترمنځ پټې معاملې ته اندېښنه لري او له طالبانو غواړي چې د یوې تلپاتې سولې لپاره دې له افغان حکومت سره خبرو ته کیني.
افغان ښځې وايي، افغان حکومت دې هغه چاته اجازه نه ورکوي، چې د افغانانو برخلیک له هېواده بهر ټاکي.
دغو لسګونو ښځو خوښي وښوده، چې په جګړه کې ښکېلو کسانو د یوې اونۍ لپاره اورکم رامنځته کړ او له طالبانو یې وغوښتل چې د افغانانو د خوښۍ لپاره دې اورکم ته دوام وکړي.
افغان ښځو د غونډې په پای کې د ښځو نړیوالې ورځې په راتلو سره مشاعره هم وکړه، چې د شعرونو زیاتره موضوعات په سولې او یوالي څرخیدل.
