پر نړیواله کچه له پرلپسې غوښتنو سره سره هم اسلام اباد غیرقانوني کډوالو په اړه پرېکړه کې نرمښت نه دی ښودلی.
د اکتوبر ۳۱، سلګونه زرو غیرقانوني کډوالو وروستۍ نېټه وه، خو پاکستاني چارواکو لا له وړاندې په کراچۍ، اسلام اباد او کوزه پښتونخوا کې زندانونه له افغان کډوالو ډک کړي.
افغان کډوال وايي، بشري ناورین ته ورته حالت سره مخ دي او وېره شته چې پاکستاني چارواکي پراخ عملیات پیل کړي.
پاکستان کې مېشت افغان خبریال ظاهر بهاند وايي:« ویل کېږي چې دا نن شپه به سرتاسري شپني عملیات به د پولیسو له لوري پلازمېنه اسلام اباد او پینډۍ کې پيل شي. دا باید هېره نه کړو چې په تېرو دوو ورځو کې د ښځو او ماشومانو په ګډون لسګونه افغان کډوال د پولیسو له لوري نیول شوي.»
پاکستان کې له افغان کډوالو سره د چلن په اړه د بشر حقونو سازمان هم اندېښنه څرګنده کړې او ژر تر ژره یې په دې پرېکړه کې د تغیر غوښتنه کړې.
یاد سازمان زیاته کړې:« د پاکستان حکومت له ګواښونو، ناوړه استفادې او توقیف څخه کار اخلي تر څو افغان پناه غوښتونکي په زوره مجبوره کړي چې د ۲۰۲۳ کال د نومبر تر لومړۍ نېټې افغانستان ته ستانه شي.»
د پاکستان لنډمهالي حکومت کورنیو چارو وزیر وړمه ورځ له رسنیو سره په خبرو کې ویلي، لومړی غیرقانوني کډوال او بیا هغه کډوال وباسي چې ملګرو ملتونو کډوالۍ ادارې ورته د اوسېدو کارتونه ورکړي.
خو افغان کډوال وايي، دا سخته ده چې په څو ورځو کې میلیونونه کډوال له پاکستانه هېواد ته ستانه شي. دوی له نړیوالې ټولنې او ملګرو ملتونو غواړي چې د پاکستان پر حکومت فشار راوړي ترڅو په خپله پرېکړه بیاځلې کتنه وکړي.
پاکستان کې د افغان کډوالو حقونو مدافع احمد افغان وايي:« پکار دا ده چې د افغانستان حکومت لوړپوړي چارواکي راشي او د پاکستان له حکومت سره له نږدې دا مسله سیاسي او ډيپلوماتیکو لارو حل کړي، ترڅو په پاکستان کې افغان کډوال چې په ډېر بد اقتصادي وضعیت کې ژوند کوي، د سیاست ښکار ونه ګرځي.»
د کډوالو او بېرته راستنېدونکو چارو وزارت د مالوماتو له مخې، په تيرو څو ورځو کې څه باندې ۷زره افغان کډوال له ایران او پاکستان په زوره او په خپله خوښه افغانستان ته ستانه شوي.
خو په ټولنیزو رسنیو کې ځینو ویډیوګانو کې ښکاري چې پاکستاني چارواکي له افغان کډوالو سره ناوړه چلن کوي او هېواد ته یې د ستنېدو پر وړاندې خنډونه جوړوي.
