ولسمشر محمد اشرف غني وایي ننګرهار به په اقتصادي مرکز بدل کړي.
ولسمشر محمد اشرف غني د سه شنبې پر ورځ د یو جګپوړي دولتي پلاوي په مشرۍ د هېواد ختیځ ننګرهار ولایت ته سفر وکړ او ددغه ولایت له والي، امنیتي مسوولینو، ولایتي شورا غړو، ځوانانو او قومي مشرانو سره یې ولیدل.
ولسمشر ننګرهاریانو سره ژمنه وکړه، چې په راتللونکو پنځه کالو کې به ننګرهار ته ځانکړې پاملرنه وکړي او دغه ولایت به په اقتصادي نقطه بدل کړي.
ولسمشر غني په غونډه کې وویل چې په ګمبیري دښته کې د لوی ننګرهار لپاره بین المللي هوايي ډګر جوړل، کونړ ته په اساسي شکل استنادي دیوالونه او د کانال پروژې د حاصلاتو د تولید لپاره نړیوال بازار موندنې لپاره لاس په کار شوی.
خو د غونډې د ګډونوالو نیوکه دا وه چې د لوی ننګرهار خلکو تل د نظام جوړولو او بریالي کولو کې رغنده رول لوبولی خو وروسته هیر شوي دي.
ولسمشر هم ومنله چې په وسله وال پوځ کې د ختیځ ځوانان تر بل هر ولایت ډېر او اغیزمن دي.
ولسمشر غني داسې وویل (( دا د ویاړ او خوښئ ځای دی چې لوی ننګرهار د پوځ په لیکو کې پراخ سرتیري لري او د افغانستان عزت ساتي. دا مه هیروئ چې کمانډو او ځانګړي قطعات مو په سیمه کې بېساري دي او وطن سره پاکه مینه لري.))
د خلکو استازو سربیره د ننګرهار والي هم هغه غوښتنې له ولسمشر سره شریکې کړې چې د لوی ننګرهار خلک يې لري.
د ننګرهار والي شاه محمود میاخېل داسې وویل (( د ننګرهار خلک د برښنا برخه کې ستونزې لري او غوښتنه همدا ده چې کافي برښنا دې ورته برابره شي. موږ درې سوه میګاواټه سولري برښنا وړاندیز کړې ده. که دا دوه سوه او یا یو نیم سل هم وي ښه به وي خو چې ژر وشي. د اوبو مهار دی او همدا ډول د اوبو شبکه ده.))
ولسمشر تر ډېره په دغې غونډه کې پر بیا رغونې خبرې درلودې خو سوله او ټاکنې دوه هغه مسایل دي چې پراخې نانندرې یي راپورته کړي دي.
