د طالبانو او امریکایانو تر منځ لاسلیک کېدونکې هوکړې ته افغان حکومت نه ور بلل کیږي.
دوحه کې د هوکړې د لاسلیک لپاره چمتوالی روان دی او لږ تر ۲۵ هېوادونه او ۵ سازمانونه ور بلل شوي دي.
افغان حکومت وايي، یاده غونډه دوی پورې تړاو نلري نو له همدې امله په کې ګډون نه کوي.
د طالبانو او امریکایانو تر منځ د هوکړې د لاسلیک لپاره اېښودل شوی شرط مثبت لوري ته روان دی.
دوحه کې طالبان او امریکایان د هوکړې د لاسلیک لپاره د غونډې جوړیدو په تابیا لګیا دي.
دې غونډې ته د ۲۵ هېوادونو او د ۵ سازمانونو استازي وربلل شوي او دغه راز یو شمېر افغان سیاسیونو ته هم بلنه ورکړل شوې ده.
طالبان افغان حکومت ته د ګډون بلنه نه ورکوي او ارګ هم تاییدوي چې دوی په غونډه کې ګډون نه کوي.
په پام کې ده چې هوکړه راتلونکې شنبه لاسلیک شي، خو د سولې د تېرو غونډو ګډونوال وايي، تر اوسه دوی ته د ګډون بلنه نه ده ورکړل شوې.
د امریکا د بهرنیو چارو وزیر په ورستیو خبرو کې ویلي چې د طالبانو او دوی تر منځ به هوکړه په ټاکل شوې نیټه لاسلیک شي.
د امریکا د بهرنیو چارو وزیر مایک پمپیو داسې وویل ((موږ د سولې په برخه کې یوه تاریخي فرصت ته رسیدلي یوو، دا اسانه نه ده چې تر لاسه شي خو باید له داسې شېبو ګټه پورته کړو. موږ اوس مهال د تاوتریخوالي د کمېدو په اوه ورځنۍ موده کې یاستو. دا د فیبرورۍ په ۲۲مه نېټه پیل شوه. دا په ۱۹ کلنه جګړه کې لومړی ځل دی چې اوه ورځنی بریالی اورکم کیږي. که دغه موده بریالۍ شي نو موږ به د امریکا او طالبانو ترمنځ د تړون له مخې د روانې فبروري میاشتې په ۲۹مه نېټه د سولې تړون لاسلیک کړو.))
د طالبانو او امریکایانو د څه باندې یو کال خبرو د وروستۍ هوکړې لاسلیک لپاره د نوي ولسمشر محمد اشرف غني د لوړې مراسم هم ځنډول شوي او د هوکړې تر لاسلیک وروسته بین الافغاني خبرو ته لار هواریږي.
