ارګ وايي، ولسمشر غني له سیاسیونو، قومي مشرانو او نړېوالو شریکانو سره له مشورو وروسته پرېکړه کړې چې د لوړې مراسم د کب یا حوت میاشتې تر ۱۹ مې وځنډول شي.
ارګ وايي، (( د کرونا ویروس د خپرېدو اوازې، د بهرنیو لوړرتبه مېلمنو د راتګ لپاره د وخت کمی او مراسمو لپاره د لا ډېر تخنیکي چمتوالي اړتیا، د دې سترې ملي برنامې د ځنډ اساسي لاملونه دي. د افغانستان جمهور رئیس د شریف ملت د حوصلې او د هیواد د لوړو مصالحو په اړه د دوی د ژور درک مننه کوي.))
له دې وړاندې د افغانستان د سولې لپاره د امریکا ځانګړي استازي د ثبات او همپالنې ټاکنیزې ډلې سره په کتنه کې ویلي، چې د ولسمشر اشرف غني د لوړې مراسم ۱۵ ورځې ځنډول شوي.
زلمي خلیلزاد له ډاکتر عبدالله عبدالله غوښتي چې د والیانو له ګمارنو لاس واخلي.
د ثبات او همپالنې ټاکنیز ټیم د رهبرۍ غړي فضل احمد معنوي ویلي؛ خلیلزاد په دې لیدنه کې ټینګار کړی، چې دواړه خواوې باید د سولې پر پلاوي ګډ کار وکړي.
خو د ارګ مرستیال ویاند دوا خان مینه پال ددې خبر د رد یا تائید په اړه څه ونه ویل.
سرچېنې د مراسمو د ځنډولو لپاره بل دلیل دا ښودلی چې دا به د امریکا په مشرۍ د سولې پروسه وننګوي.
افغان حکومت د لوړې مراسمو لپاره یو دولتي کمېسیون هم اعلان کړی و او د تیرې یکشنبې په ورځ یې لومړنۍ ناسته هم درلوده.
چين بیا ویلي، افغانستان کې د سولې او ثبات لپاره له اړوندو غاړو او نړیوالې ټولنې سره کار کولو ته چمتو دی.
د چین د بهرنیو چارو وزارت ویلي، افغانستان کې د سولې مذاکراتو په اړه له اړوندو خواو سره اړیکې او همکاري لري.
تېره ورځ چین ویلي، د افغانانو په مشرۍ د سولې او بیا پخلاینې د ټول شموله بهیر ملاتړ او د امریکا او طالبانو ترمنځ د ممکنه تړون د لاسلیک هرکلی کوي.
غربي رسنیو د امریکايي چارواکو له قوله لیکلي چې په اوسني حساس وخت کې د لوړې مراسم د روان ټاکنیز کړکیچ او د امریکا په مشرۍ د سولې د روانې پروسې په ګټه نه دي.
ارګ تر اوسه په دې اړه رسمي څه نه دي ویلي، خو موثقه حکومتي سرچینه وايي، امریکا تر اوسه د ځنډ هدف نه دی روښانه کړی، که هدف د سولې هوکړې د لاسلیک لپاره وي، نو امکان شته چې ځنډ راشي خو که هدف بل وي ځنډ نشي راتللی.
