هرات کې زلزله ځپلو ته د رسېدنې کمېسیون وایي، د زلزلې لومړۍ ورځې څخه تر اوسه د خوراکي توکو، خیمو، جامو او نورو مرستو ترڅنګ شااوخوا ۱۳۰ میلیونه افغانۍ نقدي مرستې راټولي شوي دي.
د یاد کمېسیون مالي مسوول عصمت الله یاسر وايي، دغه مرستې د ولایتونو عام وګړو، دولتي کارکوونکو، خیریه بنسټونو او بهر میشتو افغانانو له خوا مرسته شوي.
یاسر ډاډ ورکوي چې د مرستو وېش برخه کې پوره روڼتیا شتون لري او هېڅکله به دغه مرستې حیف و میل نه شي.
هغه زیاتوي: « دا کمېسیون به خپله روڼتیا ولس ته وښيي، چې مرستې څومره په روڼتیا وېشل کېږي. پرون د استخبارتو لومړي مرستیال هم دلته هرات راغلی و او د کورونو د یوه ښارګوټي جوړولو ژمنه یې وکړه چې ۲۴ میلیونه افغانۍ لګښت به پرې راشي.»
بل خوا د کابل ښاروالۍ ادارې مرستي هم هرات ته رسېدلی دی.
د کابل ښاروالۍ مسوولین وایې، شااوخوا اوه لارۍ چې په کي جامې، لوښي او د کور اړتیا وړ توکي شامل دي هرات ته یې رسولي.
دوی همداراز وایي، له دغو مرستو سربېره شااوخوا ۸.۵ میلیونه افغانۍ نقدي مرستې یې هم راټولي کړي او د زلزله ځپلو وضعیت ته رسېدو کمېسیون ته یې سپارلي دي.
د کابل ښاروالۍ ویاند نعمت الله بارکزی وايي: « د کابل د خلکو اووه لارۍ مرسته چې په دې کې البسه، فرشونه، ظرفونه او د کور اړتیا وړ نور وسایل شامل دي، هرات ته ورسېدل او موظف کمېسیون ته به تسلیم شي. همداشان ۸۵۰ میلیونه افغانۍ نغدي مرسته مو هم کمېسیون ته وسپارله.»
بل خوا زلزله ځپلي د یادو مرستو څخه خوښ دي خو وایې د تیرو زلزلو له امله یې خپل هرڅه له لاسه ورکړي او دوی ته دي د کورونو جوړولو ترڅنګ لا زیاتې مرستې وشي.
زلزله ځپلی عبدالناصر وايي:« د هرات ټولو ولسوالیو ته ډېرې مرستې راغلې او د هر کلي خلکو سره مرستې وشوې.»
دا په داسي حال کې ده چې شااوخوا درې اوونۍ وړاندې هرات کې د سختو زلزلو له امله له دوه زرو زیات کورونه په بشپړ ډول ویجاړ شوي.
