د اوسپنې پټلۍ ادارې سرپرست بخت الرحمن شرافت پر مشرۍ یو پلاوی د سه شنبې پر ورځ د ( ۱۴۰۲ کال د لړم پر ۳ مه) روسیې ته د استراخان نړیوال فورم کې د ګډون په موخه یاد هېواد ته تللی دی.
د یادې ادارې ویاند سمیع الله دارنی وايي، دا ناسته به د روسيې په استراخان ښار کې وي چې دوه ورځې به دوام وړي.
د دراني په خبره ناستې ته به د اوسپنې پټلۍ مسوولین د لاسته راوړنو تر څنګ له ګډونوالو غواړي څو افغانستان سره په ریلي همکاریو برخه کې مرسته وکړي.
هغه زیاته کړې: « په دې سفر کې به شرافت په استراخان فورم کې وینا وکړي، د افغانستان د اوسپنۍ پټلۍ لاسته راوړنې به ګډونوالو ته وړاندې کړي، د دې ترڅنګ شرافت او ورسره مل پلاوی به ګډونوالو ته بلنه ورکړي چې د افغانستان اوسپنې پټلۍ کې پانګونه وکړي. د استراخان فورم یو نړیوال فورم دی او د بېلابېلو هېوادونو استازو په کې ګډون کړی او د افغانستان په استازیتوب د افغانستان د اوسپنې پټلۍ ادارې مشر شرافت او مل پلاوی په کې ګډون کړی.»
په ورته وخت کې درانی وايي، افغانستان غواړي د ریلي همکاریو له طریقه د سیمه ییز اتصال مرکز شي، خو په خبره یې دې برخه کې د نړیوالو اړوندو سازمانونو او هېوادونو اړیکې مهمې دي.
درانی زیاتوي:« د افغانستان اوسپنې پټلۍ اداره غواړي چې دغه فورم د افغانستان د اوسپنې پټلۍ د پراختیا لپاره ګټور تمام شي. موږ وکولی شو نړیوال پولي بنسټونه، هېوادونه او سوداګر دې ته وهڅوو او قناعت ورکړو چې د افغانستان اوسپنۍ پټلۍ کې پانګونه وکړي.»
د اقتصادي چارو کارپوهان بیا وايي، افغانستان لپاره د ځمکني ترانزیت برخه ځکه حیاتي ارزښت لري چې ارزانه هم تمامیږي او که دې برخه کې پرمختګونه زیات شي، کولی شي افغانستان د خپلو توکو او سوداګرۍ لپاره اروپايي بازارونو ته په اسانۍ لاره پيدا کړي.
د اقتصادي چارو کارپوه میرویس حاجي زاده وايي: « دا غونډه چې د روسیې په استراخان ښار کې جوړېږي، په کې به د اوسپنې پټلۍ په اړه خبرې وشوي او دا د منځنۍ اسیا ټولو هېوادونو ترمنځ د اقتصادي او سواګریزو اړیکو لپاره ډېر ښه فرصت دی او په ځانګړي ډول افغانستان ته، ځکه زموږ هېواد ډېره ښه جغرافیه لري، دا د جنوبي اسیا ترمنځ د یوه ارتباطي پل په توګه دی، موږ کولی شو روسیې ته ښه صادرات ولرو، هر څومره چې د منځۍ اسیا هېوادونو او ترڅنګ یې اروپايي هېوادونو سره زموږ اقتصادي او سوداګریزې اړیکې وصل شي، دا به د افغانستان لپاره ډېر ښه فرصت وي.»
افغانستان اوس مهال د حیرتان ، تورغوندۍ او اقینې په شمول په ګڼو بندرونو کې د سیمې له هېوادونو سره د اوسپنې پټلۍ له لارې سوداګري کوي چې له کبله یې هر کال زرګونه ټنه توکي له دغې لارې انتقال کیږي.
سوداګر هم باور لري چې د هوايي دهلیز او لویو لاریو له لارې ورته د اوسپنې پټلۍ لاره اسانه او ارزانه تمامېږي او غوښتنه لري چې په دغه برخه کې باید همکارۍ زیاتې شي.
