په افغانستان کې د ملګرو ملتونو سیاسي استازولۍ (یوناما) په يوه تازه راپور کې ادعا کړې چې د سرپرست حکومت امنيت او استخباراتي ادارو په تېرو څو میاشتو کې له بشري حقونو سرغړونې کړي دي.
راپور کې راغلي، د پخوا پرتله زندانونو کې د زندانیانو شمېر زیات شوی په داسې حال کې چې حکومت ورته د ساتلو اړینې اسانتیاوې نه شي برابرولی.
د راپور یوه برخه:« د سپټمبر تر نیمايي پورې په زندانونو کې د بندیانو شمېر له ۱۷۰۰۰ لوړ شوی، چې دغه کار د زندانونو چارو سمون اداره له ننګونو سره مخ کړې کومه چې د کافي منابعو له نشتون سره مخ ده.»
یوناما د بشر حقونو مدافعینو او د رسنیو د کارمندانو خپلسرې نیونې او بندي کولو په اړه هم په خپل راپور کې مالومات ورکړي او لیکلي یې دي چې مدني فعالانو او رسنیو کارکوونکو نیونې دوام لري.
د راپور یوه برخه:« برحاله چارواکو د ناڅرګندو دلایلو له مخې د بشري حقونو د مدافعینو او په ځانګړي توګه د ښځو حقونو فعالان او د رسنیو کارکونکو نیول جاري ساتلي.»
کارپوهان ملګرو ملتونو اړوند ادارو راپورونه بې اغیزې نه بولي او له اسلامي امارته غواړي چې په ځینو برخو کې د ستونزو حل سره دا ډول راپورونه رد کړي.
که څه هم د یوناما په راپور کې د امنیتي پېښو کمښت یادونه کړې او ويلي دي چې خونړي بریدونو په شمېر کې کموالی راغلی.
یوناما په راپور کې ادعا کړې چې د تير حکومت نظامي کارکونکي نیول شوي او په زندان کې ورسره د بشرحقونو خلاف چلن شوی.
د اسلامي امارت ویاند مو د وروستي راپور په اړه وپوښت خو نوموړي د نظر ورکولو ډډه وکړه خو وړاندې له دې یې دا ډول راپورونه له حقیقته لرې بللي ول.
